Bank account hacker nadakpan

CEBU, Philippines – Lain na usab nga langyaw nga gikan sa Europa ang nadakpan sa kapulisan sa dakbayan sa Sugbo human nasakpan nga mihimo og ilegal nga transaksyon gamit ang gi-hack nga bank accounts gikan sa ubang nasud.

Ang langyaw giila nga si Denis Zadnik, 25, Slovenian national nga kasamtangan nga nagpuyo sa Sitio Kawayan, Barangay Sambag II dinhi sa siyudad.

Nadakpan si Zadnik sa mga sakop sa City Intelligence Branch (CIB) sa Cebu City Police Office human ang guwardiya sa Ayala Center Cebu nakamatikod sa kadudahan niining lihok sa suspetsado.

Matud pa ni Superintendent Romeo Santander, hepe sa CIB nga duha na diay ka bulan nga gipanid-an sa mga guwardiya sa maong mall ang suspetsado human kini nabantayan nga magbalik-balik  ug magbalhin- balhin og mga boutique nga iyang sudlan.

Nabantayan ang langyaw pinaagi sa kuha sa close circuit television (CCTV) nga naghimo og transaksyon sa mga managlahing ATM machines.

Sumala pa ni Santander nga modus sa langyaw nga mosulod sa mall kung hapit na kini manirado ilabi na kung ma-busy na ang mga anaa sa sulod.

Apan niadtong nakalabay nga gabii nakahukom ang guwardiya nga motawag sa kapulisan human nakit-an nga mibalik na usab kini sa mall diin migamit og credit card nga lahi og pangalan.

Sa dihang giimbitar sa kapulisan ang langyaw nga mouban sa ilang buhatan nagmagahi  kini ug milugnot.

Unom ka mga tawo ang mitabang og layog sa langyaw kauban ang mga sakop sa CIB ug mga guwardiya una pa nila nadala sa CIB.

Sa pagrekisa kaniya narekober ang 28 ka mga credit cards nga adunay mga pangalan nga daw Filipino.

Nagtuo si Santander nga posibleng kauban ang suspek sa Romanian nationals nga ilang nasikop nga nalambigit gihapon sa bank account hackings didto sa Uropa ug dinhi sa Pilipinas nila i-withdraw ang kinawat nga salapi.

Si Santander nagtuo nga dako kining sindikato. Nakuhaan usab siya og driver’s license nga dunay address sa Makati City.

Ang CIB nakig-alayon na sa Bureau of Immigration aron masayran kung kanus-a nakasulod sa nasud ang suspetsado.

Ang langyaw dili motubag gawas lang sa pag-ingon “just talk to my abogado.” Kasong paglapas sa R.A 8484, Access Device Regulation Act ang ipasaka sa kapulisan sa langyaw nga kasamtangan nga gikostudiya sa buhatan sa CCPO. (Jojo C. Ugdol/EIM)(BANAT NEWS)