Nakuryentihan sa Christmas tree

CEBU, Philippines – Patay ang usa ka 9 anyos nga batang lalaki human kini mikirig sa dihang nakuryentehan sa Christmas Tree nga gipabarog diha sa plaza sa Poblacion sa Lungsod sa Ronda pasado alas 10 sa nakalabay nga gabii.

Ang nakuryentehan patay mao si Kevin Gimena, nagtungha sa elementarya sa Barangay Canduling diin kini nagpuyo.

Matud pa ni Police Officer 2 Virgilio Villamor, desk officer sa Ronda Police nga nahinabi sa Banat News nga kauban sa biktima ang laing mga bata nga nagdula-dula sa maong dapit.

Dunay mga Christmas Trees nga gipangbutang sa kagamhanang lokal sa Ronda sa “Open Park” isip dayan-dayan sa pagsaulog sa Pasko.

Sumala pa ni Villamor nga nakit-ang misulod ilawom sa usa sa mga Christmas Tree ang bata ug pagkataod-taod kalit lang kini nga natumba.

Ang mga tawo nga nakakita sa hitabo dali unta nga mitabang ug mihulbot sa bata dayon gidala kini sa Rural Health Unit sa lungsod apan nakabsan gayod kini sa iyang kinabuhi.

Si Villamor miingon nga lagmit nagunitan sa bata ang livewire sa series light ilawom sa Christmas Tree o iyang naibot ang socket sa wire ug nahawiran.

“Basin og nagkuot-kuot ni sa ilawom unya nahawiran niya ang live-wire o socket mao ‘tong pwerting kuryentiha,” matud pa ni Villamor.

Human sa hitabo gipangsubay na usab sa kapulisan ang tanan nga Christmas Tree sa plaza aron mabalhin kadtong duna’y mga wires sa ubos nga bahin aron mapahimutang sa ibabaw nga dili na maabot sa mga bata.

Sa nasayran ni Villamor sa dihang kini nadestino sa Ronda Police kadto pa ang unang higayon nga adunay nakuryentihan patay sa Christmas Tree sa ilang lungsod. (Jojo C. Ugdol/EIM)(BANAT NEWS)