Pagpalusot og krudo nasakpan

CEBU, Philippines - Dili mominos tulo ka drum nga gituohang kinawat nga krudo gikan sa usa ka shipping company ang nasakmit sa mga sakop sa kapulisan atol sa buy-bust operation diha sa Daviera Street, Barangay Carreta ning dakbayan sa Sugbo kagahapon sa buntag.

Atol sa maong operasyon duha ka mga tawo ang nadakpan nga sila si Gorgonio  Armenteros, 40, taga Barangay Dungoan, Dakbayan sa Danao ug Gerald Villegas, 42, nga taga Barangay Pardo ning Dakbayan sa Sugbo.

Si Armenteros gikatahong caretaker sa ilegal nga negosyo nga gipanag-iya sa usa ka alyas “RJ Gumulon,” samtang si Villegas miangkon usab nga tigtakos sa mga krudo ngadto na sa mga containers.

Ang duha nadakpan sa mga sakop sa Criminal Investigation and Detection Group-7 human sila gikatahong mibaligya og duha ka containers nga krudo nga 20 litros ngadto sa asset sa kapulisan bugti sa kantidad nga P1, 500.

Atol sa pagsikop sa duha, nakuhaan usab sila og usa ka .357 Magnum Revolver, pinaketeng shabu ug mga drug paraphernalia.

Matud pa ni Senior Superintendent Marlon Tayaba nga nakadawat sila og reklamo gikan sa Cokaliong Shipping Lines nga ang mga krudo nga alang unta sa ilang barko gipangkuhaan sa maong mga suspek.

Sigun pa ni Tayaba nga matag semana ang maong shipping company mo-order og 10 mil ka litros nga krudo apan ang drayber ug checkers giingong nagkonsabohay kay imbes 10 mil ka litro, otso mil litros lang ang ihatod kay ang dos mil litros ang ibaligya sa uban.

“But according to Cokaliong (Shipping Company) complaint, thousands of liters na ang nawawala. Recently, I believed 2,000 ang nawala sa kanila,” matud pa ni Tayaba.

Mihimo og operasyon ang kapulisan batok sa duha human  ang manager  sa gasoline station ang nakabantay sa tanker truck nga mitipas og rota imbes modiretso sa shipping company.

Si Armenteros miingon nga caretaker lang siya sa maong negosyo ug wala nasayod nga sa ilegal diay gikan ang maong mga krudo.

Matud pa niya matag adlaw makadawat sila og dos mil litros nga krudo. Ang matag drum adunay sulod nga 200 litros nga ilang gipalit sa tag P2, 800 matag drum ug ila usab nga ibaligya sa tag P3,800, diin sagad sa ilang mga customer mga anaa sa trucking services company.

Gitanggong na sa selda sa CIDG-7 ang duha ka mga dinakpan nga mag-atubang og  kaso paglapas sa R.A 8479 o an Act Deregulating the Downstream Oil Industry and for other purposes ug Comprehensive Drugs Act of 2002. (BANAT NEWS)