‘No Bio, No Boto’ hapsay na
CEBU, Philippines - Mapasalamaton ang Commission on Elections nga gibasura sa Korte Suprema ang petisyon sa Kabataan Party-list sa pagbasura sa “No Bio, No Boto” policy.
Si Provincial Election Supervisor, Atty. Lionel Marco Castillano, nagkanayon nga nahuman na sila og clustering ug finalized sa voters list.
Una niini nabalaka ang Comelec nga momando ang Korte Suprema nga pabotaron ang deactivated na nga mga botante ug makalangan kini sa ila’ng pagpangandam sa umaabot nga eleksiyon.
Gilibkas na sa Korte Suprema ang temporary restraining order (TRO) ug gibasura ang petisyon human nasuta nga wala kini merito.
Matud ni Castillano nga mapasalamaton gyud kaayo sila sa Korte Suprema tungod kay bisan unta og recess na sila nagpahigayon sila og special en banc session aron mahatagan og pagtagad ang petisyon.
Si Castillano nagkanayon nga makalihok na sila pag-usab alang sa ila’ng pagpangandam.
Base sa talaan sa Comelec, sa Oktubre 31, 2015 ang Probinsiya sa Sugbo aduna’y 2.6 milyones nga registered voters diin 74,110 niini ang wala’y biometrics data samtang adunay 3,019 ka clustered precinct alang sa 2016 nga eleksiyon.
Matud ni Castillano nga dili makabaton og limpyo’ng eleksiyon kung dili limpiyohan ang listahan sa mga botante.
Ang balaud nagwagtang kini sa mga flying voters, multiple ug double registrants lakip na kadto’ng mga patay na nga wala matangtang sa listahan.
Gipasabot ni Castillano nga daku kaayo og epekto sa eleksiyon nga kung kadto’ng wala’y mga biometrics tugutan nga makabotar tungod kay duna kini posibilidad nga laing tawo ang mobotar tungod kay wala man sila’y mga hulagway sa ila’ng record. (BANAT NEWS)
- Latest
