Babayeng South African naningil sa utang gipusil

CEBU, Philippines - Nalandig sa tambalanan ang usa ka South African national human kini napusilan sa iyang higala nga iyang gipaningil sa utang niini diha sa Sitio Club Kawayan, Barangay Sambag I, ning Dakbayan sa Sugbo sa nakalabay nga gabii.

Giila ang biktima nga si Deborah Kakambe, 24, dalaga, 2nd year student sa Southwestern University sa kurso nga BS Biology ug kasamtangan nga nagpuyo sa Barangay Calamba. Samtang suspek sa krimen mao si Generoso Pepino, alyas Jimboy, 31, temporaryo nga nagpuyo sa maong dapit ug lumad nga taga Barangay Suwa, Argao.

Matud pa ni Senior Police Officer 3 Wetzel Berry, imbestigador sa Homicide Section sa Cebu City Police Office nga nahinabi sa Banat News miadto ang biktima sa gipuy-an sa suspek aron maningil ug sukoton usab kini sa cellphone nga gipaayo sa biktima diha sa suspek.

Tunga-tunga sa ilang lalis gikatahong mikuha og sumpak si Pepino ug gipusil ang paa sa dalaga, gumikan sa kahadlok ug kaluoy sa suspetsado kini maoy nidala sa biktima sa usa ka pribadong tambalanan ug pagkahuman nisibat kini.

Padayon nga gipangita sa kapulisan ang suspetsado nga nag-atubang og kasong frustrated murder. (BANAT NEWS)