Gi-salvage gitambog sa dagat

CEBU, Philippines - Gidudahang sakop sa robbery group nga naglihok sa Consolacion ug kasikbit nga mga lungsod ang gipatay sud sa iyang balay sa Sitio Bangkerohan, Cabangahan, Tayud, sa Lungsod sa Consolacion ug gitambog kini sa dagat ug pagkabuntag na nakit-an.

Giila ang biktima nga si Jayward Salarsa,19, nga giingong adunay warrant of arrest sa kasong pagpanulis.

Base sa imbestigasyon sa kapolisan, adunay nadungog nga butobuto sa armas ang mga silingan sa biktima pasado alas 11 sa miaging Miyerkules sa gabii maong nanawag sila og mga polis.

Matud pa ni Police Officer 1 Ritchie Guilleran ang manghod nga babaye sa biktima nga si Jansen Salarsa maoy miingon nga ang iyang igsuon sakop sa Salarsa Robbery Group.

Alas 11 pasado ang takna sa miaging gabii nakadawat og alarma nga pagpamusil ang kapolisan apan dihang ilang gisusi ang panimalay sa biktima wala silay naabtan nga tawo apan aduna silay napalgang kabhang sa kalibre 45 ug deformed slug ug usa ka bala sa kalibre .38.

Sumala pa sa kapolisan, walay nakakita sa insidente gawas lang nga aduna silay nadunggan nga butobuto gikan sa balay sa biktima, hinungdan nga namauli na lang sila.

Apan alas- 4  pasado ang takna sa kaadlawon gipahibalo sila sa mga barangay tanod sa Tayud  kalabot sa patay’ng lawas sa tawo nga naglutaw sa daplin sa dagat, ug sa ilang pag-adto, lawas diay kini ni Salarsa.

Nakaplagan kini sa baybayon 20 metros lamang gikan sa iyang balay nga girespondehan sa mga polis nianang pagkagabii. (BANAT NEWS)