Giunay sa kumpare

CEBU, Philippines - Maayong pagkatabas sa liog ug nakaangkon og dakung samad sa ulo ang usa ka lalaki human kini gidunggab sa lalaking nagtuo nga karelasyon sa iyang asawa diha sa usa ka lawak sa First Apartelle Avenue, Sitio Chamba-Chamba, Barangay Pusok dakbayan sa Lapu-Lapu, pasado alas 8 kagahapon sa buntag.

Giila ang biktima nga si Windsess Geijolos, 34, samtang suspek sa krimen mao si Manuel Godinez, 30, taga Brgy. Buaya sa maong siyudad.

Matud pa ni Police Officer 3 Jerson Alparito sa Homicide Section sa Cebu City Police Office nga nahinabi sa Banat News  gikatahong duha na ka adlaw nga nag-check in sa usa ka lawak si Godinez kauban ang iyang asawa.

Sumala pa ni Alparito nga si Godinez nagduda nga adunay relasyon si Geijolos ug ang iyang asawa kay usahay iyang makita nga magteksanay ang duha.

Kagahapon sa buntag usa ka text ang nadawat sa biktima nga nag-ingon nga paadtuon kini sa apartelle aron husayon ang problema nilang managhigala.

Apan matud pa naglalis na hinuon ang duha ug misangpot sa away ug gidunggab  sa  biktima sa gidala nga porma og uhas sa Indiyan Pana ang suspetsado hinungdan nga nasamad ang kamot niini.

Apan kay mas dakong tawo si Godinez nailog niini ang hinagiban  ug maoy iyang gigamit pagdunggab sa liog ni Geijolos.

Gidudahan usab nga gipusposan pa og botilya sa ulo si Geijolos ug ang binuak maoy giluglog sa ulo niini maong aduna kini dako kaayong samad sa ulo.

“Version ni sa suspek nga siya daw ang unang gidunggab unya nailog niya kadtong pointed arrow. Murag lapad nga tumoy sa Indian pana, mao ‘tong napatay niya,” matud pa ni Alparito.

Nadakpan ra usab dayon sa kapulisan ang suspetsado.

“Maghatagan pa daw ni og babaye ning biktima sa suspek basin ba og nagkabistohan ba. Plus sa pagduda niya nga naa’y relasyon sa iyang misis posibleng mao nato nganong pwerting sukoa niya,” saysay pa ni Alparito.

Apan sa laing bersyon, nga nakuha sa kapolisan pinaagi ni SPO2 Manolito Abellanosa, gikatahong nagkalalis ang magtiayon kay giingong gisumbong sa biktima sa asawa nga aduna kini laing babaye ug gisultihan usab ang asawa kun asa nagpuyo ang kabit niini. Sumala pa nga mao kini ang hinungdan nga nagkabingkil ang managhigala. 

Samtang kagahapon sa hapon, usa ka ginang ang nalandig sa tambalanan human kini kalit nga gilayog ug gisamad-samaran og blade sa laing babaye sud sa usa ka fastfood chain diha sa dalan Colon, Cebu City atol sa children’s party.

Hangtud ning pagbalita wala pa mohatag og detalye ang Waterfront Police Station kabahin sa insidente apan adunay impormasyon nga daan nang nibahad ang suspek nga mag-abot ra gihapon sila. (BANAT NEWS)