Kapitolyo nagpatabang sa pribado’ng doktor

CEBU, Philippines - Nikuha ang Kapitolyo og mga pribado’ng doktor isip consultant sa pagpauswag sa 16 ka hospitals sa probinsiya.

Si Capitol information officer Ethel Natera nagkanayon nga ang Private Sector Cooperation on Hospital Cases Management niadto pa’ng 2013 gisugdan apan kagahapon lang gilusad.

Si Provincial Administrator, Atty. Mark Tolentino, niklaro nga ang paglusad wala’y kalambigitan sa mga nasugatan nga isyu karon sa mga tambalanan sa probinsiya.

Buot lang nila’ng mahibaw-an sa tanan nga ang probinsiya adunay gihimo’ng lakang sa pagpauswag sa mga tambalanan ug sa mga serbisyo aron matubag ang mga problema nga giatubang.

Ang mga gipang-hire nga consultant gilangkuban nila ni Dr. Rene Catan, Dr. Manuel Villamor nga usa ka surgeon ug Dr. Lily Aranas kinsa kanhi director sa Department of Health-7.

Nasuta ni Catan nga ang mga tambalanan sa probinsiya kuwang sa pasilidad ug ang mga non-medical staff daghan itandi sa medical personnel.

Si Provincial General Services Officer Jone Siegfred Sepe, sakop sa hospital support development committee, nagkanayon nga sa pagtubag sa kakuwang sa mga medical personnel ang mga outsource personnel gi-hire kini direkta aron gyud makomitado sila sa pagserbisyo.

Kini gilangkuban sa mga doktor, nurse, midwife ug institutional workers.

Ang Kapitolyo nag-hire usab og 81 ka personnel nga ubos sa permanent items alang sa upat ka provincial hospitals.

Kini gilangkuban sa 24 ka internal medicines, surgeons, pediatricians, OB-gyne ug anesthesiologist.

Kabahin sa mga nangamatay nga pasyente, si Aranas nipasabot nga ang “acceptable death” sulod sa “below 48 hours” naa lang sa 3-3.5 porsiyento.

Apan “after 48 hours” kung maayo ang serbisyo sa hospital diyutay lang ang mamatay ug ang “acceptable rate” anaa lang sa 1-2 porsiyento.

Gipasabot ni Aranas nga naa gyuy mamatay sa hospital apan ang uban usab mohatud sa ila’ng pasyente kung grabe na ug hapit na mamatay. (BANAT NEWS)