‘Abusado’ nga polis gireklamo sa silingan
CEBU, Philippines - Gipangita sa mga kauban ang usa ka polis nga gipasanginlan nga hubog ug nanion og armas, nagpabuto sa armas ug nibunal pa sa windshield sa multicab sa iya’ng silingan sa Barangay Cadulawan, Lungsod sa Minglanilla pasado alas 2 sa nakalabay nga kadlawon.
Giila ang polis nga si Police Officer 3 Louie Alalim kinsa nadestino sa Regional Headquarters Support Group (RHSG) sa Camp Sergio Osmeña Sr.
Si Lyndon Caparida, 43-anyos, silingan sa polis ang nagpakitabang sa kapolisan human sa ila’ng komprontasi sa suspek kinsa nisibat human sa hitabo.
Ang hepe sa Minglanilla Police Station, Chief Insp. Franco Rodolf Oriol, niingon nga gikan sa airport ang biktima nga nagkuha sa iya’ng kapuyo.
Apan sa pag-uli sa balay kalit lang naabot ang polis ug nikomprontasi ni Caparida.
Sumala pa nga giti-onan sa armas si Caparida ug nagpabuto sa iya’ng armas upat ka higayon.
Wala pa makontento ang polis giingong gibunalan pa sa iya’ng armas ang windshield sa multicab una pa nilakaw.
Human sa hitabo dali nga nitawag og polis si Caparida diin sa pagresponde sa kapolisan ila’ng narekober ang upat ka basiyo sa .9mm pistol sa nahitaboan.
Gitug-an ni Oriol nga ang iya’ng mga sakop nagpaabot sa gawas sa balay sa polis hangtud alas 6 sa buntag diin ila pa nga gisubay ang mga lugar nga lagmit giadtoan sa polis apan sila napakyas.
Ang giingong pagpasalba sa polis nahitabo human ang Police Regional Office-7 nihimo sa muzzle-taping sa mga armas sa mga polis niadto’ng adlaw nga Lunes.
Nasayran usab sa Banat News nga kagahapon sa buntag wala na nipakita sa iyang trabaho si Alalim. (BANAT NEWS)
- Latest
