PNP nangandam sa Misa De Gallo

CEBU, Philippines - Minilyon ka mga Pilipino ang gipaabot nga modugok karon sa nagkadaiyang mga simbahan sa nasud alang sa pagsaulog sa tradisyonal nga Misa de Gallo sa Simbahang Katoliko.

Nangandam usab niini ang kapulisan ug mga local government units alang sa paghatag og seguridad sa mga manimba.

Si Cebu City acting Mayor Edgardo Labella mimando na sa Cebu City Police Office ug sa mga barangay nga i-deploy ang kapolisan ug mga barangay tanod sa mga simbahan aron mobantay.

Matud pa sa hepe sa Police Community Relations sa Cebu City Police Office, Chief Inspector David Señor nga duna’y 34 ka mga simbahan lukop siyudad ang ila karon nga gitutukan og tagaan sa seguridad human ilang napanglantawan ang pagsugwak na unya sa mga tawo.

Ang mga polis station nga duna’y mga simbahan nga nasakopan mao na sa’y gitahasan sa pagbantay sa ilang nagkadaiyang dapit.

Apan gumikan kay limitado ra ang pwersa sa kapulisan duna’y usa ka gatos ka mga sakop sa Regional Mobile Group (RMG) ang idugang aron mobantay.

Ang hepe sa kapulisan sa CCPO, Sr. Supt. Marciano Batiancela mimando usab sa mga hepe sa mga nagkadaiyang police stations nga pangunayan pagpangulo ang ilang mga sakop diha sa gibantayang simbahan.

Walay polis nga gitugotang makabakasyon karong panahon sa Pasko

Si Labella sa Dakbayan sa Sugbo miingon nga kinahanglang visible ang kapulisan diha sa mga simbahan ug angay nga adunay maglibot-libot nga mga polis.

Giawhag usab ni Labella, ang Association of Barangay Councils nga pinangulohan ni Kapitan Philip Zafra sa pag-activate sa mga barangay tanod aron moapil pagtabang sa kapulisan para mapahapsay ug malinawon ang Misa de Gallo.

Si Labella nibutyag nga tipik sa iyang petisyon mao ang: "Peace, Harmony, Enlightenment, ilabi na ngadto sa mga public official nga magtinabangay ug ipakita namo ang kaayo, tungod kay public service is not a power, its a responsibility given to serve the public."

Samtang sa dakbayan sa Mandaue, gimando ni Supt. Julian Entoma , officer in-charge sa Mandaue City Police Office (MCPO) sa mga hepe sa unom ka presinto sa pagdestino sa ilang mga sakop sa matag Simbahang Katoliko.

Pabantayan ang National  Shrine of Saint Joseph sa Barangay Centro sa maong Dakbayan nga ubos sa Presinto 1,  San Roque Parish Church sa Barangay Subangdaku nga ubos sa Presinto 2 sa MCPO.

Lakip na  ang Christ the King sa Barangay Alang-Alang, Birhen sa Fatima sa Barangay Basak, Señor Santo Niño sa Barangay Paknaan ug uban pa.

Gipasidan-an usab ang mga manimbahay pagsiguro nga masirado ang ilang mga panimalay aron di sila mabiktima sa mga kawatan.

Mipahimangno usab ang kabomberohan sa pagpawong sa ilang mga appliances nga naglakip sa airconditioning unit, refrigerators, electric fans, ceiling fans, mga Christmas lights, series lights ug uban pa aron malikay sa sunog. (BANAT NEWS)