Polis gibaligyaan og shabu

CEBU, Philippines - Kapin sa P200 mil nga kantidad sa shabu ang nasakmit sa kapolisan gikan sa 36-anyos nga lalaki human usa ka polis ang gibaligyaan sa Sitio Lupa, Barangay Basak-San Nicolas, Dakbayan sa Sugbo pasado alas 10 sa nakalabay nga gabii.

Ang dinakpan naila nga si Rodel Angcay, ulitawo nga nagpuyo sa mao’ng dapit.

Si Senior Insp. Regino Maramag Jr., hepe sa Mambaling Police Station, ang nangulo sa buy-bust operation. Diha’ng nisulod sa mao’ng dapit ang usa ka polis nga nagpatuo nga mopalit og drugas, tayming usab kini nga gitawag ni Angcay nga, “asa mo bay?”

Nitubag usab ang polis nga gusto nga mopalit og shabu ug nihatag og usa ka pakete si Angcay bugti sa P200.

Didto na gisignit sa kapolisan si Angcay ug nakuhaan pa kini og daghang shabu nga nitimbang og 25 gramos nga kantidad og kapin P200,000.

Gawas sa drugas nakuha usab sa kapolisan gikan ni Angcay ang usa ka black widow Dillinger 22 revolver nga dunay unom ka bala.

Gitanggong na sa selda sa Mambaling Police Station ang dinakpan nga gikatakda’ng pasakaan og tukma’ng kaso. (Jojo C. Ugdol/GMR)(BANAT NEWS)