Paz nakuratan sa mga minors sa bar
CEBU, Philippines - Nakuratan si Lapu-Lapu City Mayor Paz Radaza sa pagka-rescue sa mga minor de edad nga gibugaw og bayot sa usa ka bar sa Barangay Pajo sa niagi’ng Biyernes sa gabii.
Nunot niini ipatawag ni Radaza ang atensiyon sa mga tag-iya sa mga bars ug ang Barangay Council for the Protection of Children.
"Actually, nahibung ko when I read the newspaper kay we have a local council for the protection of children wherein part sa trabaho nila is ang pag-check sa mga bars, disco-han o mga karaoke kung wala ba’y minors," matud ni Radaza.
Makig-alayon ang mayor sa Department of Social Welfare and Development human na-rescue sa kapolisan ang usa ka 14-anyos ug duha ka 17-anyos nga mga bata’ng babaye.
Ang 14-anyos gikataho’ng nagpuyo sa Dakbayan sa Mandaue samtang ang duha ka 17-anyos gikan sa Lungsod sa Compostela ug Consolacion. Gitataw ni Radaza nga miyembro sab siya niini sa una nga mopahigayon og inspeksyon sa mga bars ka duha sa usa ka buwan ug mosusi kung kinsa ang mga mosulod gawas sa pag-check sa mga health cards sa mga empleyado ug kung may business permit ba ang establesemento.
"Ila’ng pangutan-on ang management ug estoryahon ang mga tawo if minor ba gyud," matud ni Radaza. Posible’ng pasirad-an sa City Hall ang mga bars ug videokehan kung magpasulod og mga minor de edad.
Dugang sa mayor nga padayon nila’ng gi-monitor ang mga ilegal nga kalihukan sama sa sex trafficking ug cyber pornography diin nakig-alayon sab sila sa Children's Legal Bureau ug International Justice Mission. (Christell Fatima M. Tudtud/GMR)(BANAT NEWS)
- Latest
