Kampanya vs piccolo gibalik

CEBU, Philippines – Gihingusgan karon ang panawagan batok sa paggamit sa makamatay nga pabuto nga piccolo nga diin liboan na ka mga bata ang nakalas ug naangol matag tuig panahon sa kapaskohan.

Ang EcoWaste Coalition mipagawas og pahimangno lakip na panawagan sa mga otoridad kabahin sa peligro nga nagpaabot sa kabataang mogamit sa maong matang sa pabuto.

Sumala pa ni Aileen Lucero, coordinator sa  EcoWaste Coalition niadto pang tuig 2007 gi-ban ang Piccolo. Kini maoy numero unong hinungdan sa pagkamatay ug pagkaangol sa mga bata panahon sa kasadya sa Pasko ug pagsugat sa Bag-ong Tuig.

Gipanawagan karon sa ilang grupo ang mga otoridad ilabi na ang mga mayor, police chiefs ug barangay officials nga seryosuhon ang kampanya batok niining piccolo.

Giawhag nila sila paglusad kanunay og operasyon pagpangita ug pagsakmit niini gikan sa mga tindahan ug pasakaan og kaso kadtong masakpang nagbaligya niini.

Ang Pilipinas adunay balaod nga Republic Act 7183 (“An Act Regulating the Sale, Manufacture, Distribution and Use of Firecrackers and Other Pyrotechnics”) nga mahimong ipasaka batok niadtong mga malapason.

Gihangyo usab sa grupo ang mga vendors nga sila na mismo ang moaksiyon pagtabang sa kampanya pinaagi sa dili pagbaligya niini nga matang sa pabuto ilabi na sa mga bata ug ipatigbabaw ilang konsensya ug dili ang ginansya.

“Have a conscience please, don’t rake in profits at the expense of children’s health and safety.  The next victim could be your own child,” pasidaan pa ni Lucero.

Si Department of Health Secretary Janette Garin pirmeng naghangyo sa mga mayor ug kapolisan nga ipatuman gyud ang ban sa piccolo.

Base sa talaan sa DOH, 32 porsiyento sa 840 ka mga natalang nabuthan og pabuto niadtong 2014;  36 porsiyento sa 997 ka firecracker-related injuries sa 2013 ug 26 porsiyento sa 931 firecracker-related injuries sa 2012, pulos tanan biktima sa piccolo.

Ang EcoWaste Coalition moduyog sa DOH- “Iwas Paputok” campaign didto sa National Capital Region karong Disyembre 14.

Ang grupo molusad usab sa ilang kampanya nga “Santa’s Guide to Safe and Non-Toxic New Year’s Festivity” ug mas maayo pang mogamit na lang og torotot ug uban pang butang gawas lamang sa mga pabuto sa ilang pagsabasaba alang sa luwas nga pasugat sa Bag-ong Tuig. (BANAT NEWS)