Paghimo og mga buhat sa kaluoy–Palma

CEBU, Philippines – Gatusan ka mga magtutuo uban sa pipila ka mga kaparian sa Archdiocese of Cebu ang nitambong sa pagbukas sa Jubilee Door sa Cebu Metropolitan Cathedral nga gipangulohan ni Archbishop Jose Palma kagahapon.

Gisugdan pinaagi sa usa ka seremonya sa pagbukas sa Jubilee Door ang Santos nga Misa human kini gitak-opan niadtong pagtapos sa pagsaulog sa ika-75 ka tuig sa Archdiocese of Cebu.

Atol sa pagbukas sa Jubilee Door mao usab ang pagbukas sa Year of Mercy diin giawhag sa Arsobispo ang katawhan nga maghimo og mga buhat sa kaluoy sama sa pagbisti sa mga hubo, pagpakaon sa mga gigutom, pagbisita sa mga masakiton o priso diin ang tawo mahimong mobuhat og corporal o spiritual works ngadto sa iyang isig ka ingon.

Matud pa sa Arsobispo kinahanglan kini nga magmaya bisan pa man sa mga panghitabo nga nanglabay tungod kay sa kanunay ang Ginoo nagpakita sa iyang tumang kaluoy ngadto sa tanan niyang mga anak.

Giawhag sa Arsobispo ang tanang katawhan nga moagi gayud sa Jubilee Door matag higayon nga naa sila sa Cathedral aron makadawat og Plenary Indulgence.

Apan kinahanglan nga sila nakapangompisal sa ilang mga sala ug moampo sa intensyon sa Santo Papa sa ilang pagsulod sa pultahan ug mokalawat kung adunay Santos nga Misa atol sa ilang pagbisita sa Jubilee Door.

Gibutyag usab ni Palma nga gawas sa Cebu Metropolitan  Cathedral aduna usab mga simbahan nga gibuksan ang ilang Jubilee Door alang sa mga magtutuo nga dili makaanhi sa siyudad, kini naglangkob sa St. Catherine de Alexandria sa Dakbayan sa Carcar, San Vicente Ferrer Parish Bogo City, St. Peter and Paul Bantayan Island, St. Joseph San Francisco Camotes Island, ug sa Parokya sa lungsod sa Balamban.

Gipadayag sa Arsobispo  nga usa ka dako kaayong balita nga " God becomes Emmanuel, taliwala sa panghitabo ang gugma, kaayo ug pasaylo sa Dios matagamtaman sa tanan mga tawo. – /EIM) (BANAT NEWS)