Mga kalihokan sa kabataan sa Simbahan sugdan

CEBU, Philippines - Youth Ministry Awareness Week (YMAW) sa Archdiocese of Cebu sugod karong adlaw nga Domingo atol sa pag-abli sa Jubilee Door sa Cebu Metropolitan Cathedral.

Matud pa ni Yries John Repollo, District 2 youth president, mga nagkadaiyang parokya nga sakop sa Archdiocese of Cebu mopahigayon og nagkadaiyang kalihukan subay sa YMAW nga gitakda sa Catholic Bishops Conference of the Philippines nga saulogon sugod sa Disyembre 13 ngadto sa 19.

Sumala pa ni Repollo, sila sa ilang parokya sa Tuyan magbiseklita sa tibuok adlaw ug magbutang sila og mga bandila ug guyoron ang mga lata aron sa pagsaba-saba sa kadalanan.

Kini aron sa pagpahibalo sa katawhan nga nagsugod na ang kalihukan sa mga kabataan.

Gibutyag ni Repollo aduna pa silay mga kalihukan nga giandam sama sa feeding sa mga kabataan ug sa prisohan.

Samtang si Edna Arellano sa Commission on Youth sa iyang bahin nibutyag nga atol sa pagtak-op sa YMAW mopahigayon sila og Share a Smile  project ngadto sa 100 ka mga bata sa St. Joseph Parish sa Dakbayan sa Mandaue.(Rowena Capistrano/EIM)(BANAT NEWS)