Pag-oktaba sa Mandaue-Mactan Bridge repairs OK

CEBU, Philippines - Ang mga opisyal sa Mactan Cebu-Bridge Management Board (MCBMB) mihangyo sa Department of Public Works and Highways (DPWH) nga ipauswag una ang pagpaayo sa Mandaue- Mactan Bridge paglikay sa kahuot sa trapiko atol sa pagpahigayon sa Sinulog ug International Eucharistic Congress (IEC). Si Mayor Paz Radaza maoy unang misugyot niini sa miaging buwan nga ioktaba una ang pag-repair sa maong taytayan kay daghang mga dagkong kalihokan sa Metro Cebu lakip na ang Siyudad sa Lapu-Lapu sa umaabot nga mga bulan.

Si Radaza mipalabang og mosyon aron pag-uswag sa pag-ayo sa nahisgutang tulay ug aron usab mahatagan og panahon ang DPWH nga makakuha  og dugang  mga trabahante aron madali ang pagtrabaho niini. Kahinumdoman nga dihang giayo ang maong mga taytayan daghan ang nangreklamo kay gipasangil nga langay kaayong motrabaho ang maong ahensya hinungdan nga naghuot ang trapiko sa maong taytayan kaniadto.

Ang DPWH migahin og P154 milyones alang sa pagpaayo sa first Mactan Bridge.

Sa milabay’ng buwan  pa unta gitakda ang pagpaayo niini diha sa habig sa A. Soriano sa Mandaue  apan si Radaza mihangyo  nga inig kahuman na lang sa Sinulog ug sa IEC. Gilauman ang grabeng kahuot unya sa trapiko diha sa dakbayan sa Mandaue ug Lapu-Lapu tungod niini.

Si Dean Martin Paduga, assistant legal officer sa DPWH miklaro nga wala pay tukmang panahon ang pagsugod sa pag-ayo sa tulay. Matud niya nga wala pa usab kini matuki ngadto sa rehiyonal nga buhatan sa DPWH apan kay nahisgutan na man kini sa board kagahapon ipaabot niya ngadto sa rehiyon ang hangyo. (BANAT NEWS)