Dugang cash aid nadawat sa seniors sa Mandaue
CEBU, Philippines - Gipanghatag na sa kagamhanan sa Dakbayan sa Mandaue ang dugang tag P1,500 nga pinansiyal nga hinabang ngadto sa 15,000 ka senior citizens.
Ang una’ng 4,000 ka senior citizens sa Barangay Subangdaku, Tipolo, Bakilid, Banilad ug Casuntingan ang una’ng nakadawat kagahapon.
Kabahin kini sa una’ng P1,500 nga ila’ng nadawat sa niagi’ng buwan aron makompleto ang tag P3,000 karong tuiga. Nitambong sa pagpanghatag sa hinabang si Bise Mayor Glenn Bercede kinsa magpapili sa pagka-sakop sa hunta probinsiyal sa ikaunom nga distrito.
Gipahibawo ni Bercede nga sa 2016 madoble na ang kantidad nga madawat sa mga senior citizens sa dakbayan gikan sa P3,000 ngadto na sa P6,000 matag tuig.
May skedyul na usab ang pagpanghatag sa ubang barangay.
Alas 9 sa buntag karong Disyembre 12, ang pagpanghatag himuon sa City Hall ground ug mao’y makadawat ang Barangay Centro, Mantuyong, Cambaro ug Guizo. Magsunod ang Umapad, Basak, Jagobiao, Canduman, Maguikay ug Cabancalan. (BANAT NEWS)
- Latest
