CPRA uyon sa reclamation sa Minglanilla

CEBU, Philippines - Wala’y supak ang Cebu Provincial Reclamation Authority sa reclamation project sa Ming-Mori Development Corporation sa Lungsod sa Minglanilla.

Human sa tigum kagahapon, ang CPRA gikatakda nga mo-isyu og certificate of no intervention ngadto sa kompaniya.

Nitambong sa tigum sa CPRA ang mga opisyal sa Lungsod sa Minglanilla ug mga representante sa Ming-Mori.

Si Mayor Lani Peña nibutyag nga ang CPRA gikadakda’ng moduso sa ila’ng rekomendasyon ngadto sa hunta probinsiyal alang sa resolusyon nga mao’y iduso ngadto sa Philippine Reclamation Authority (PRA).

Matud ni Peña nga ang tanang rekisitos nga gipangayo sa PRA naduso na nila.

Ang mao’ng multi-billion project gikatakda’ng tukuron sa Barangay Calajo-an Proper paingon ngadto sa Tungkil nga may gilapdon nga 100 ka ektarya.Matud ni Peña nga ang tukuron nga reclamation usa ka “island type” o susama sa South Road Properties diin butangan og industrial park ug gilauman nga madugangan ang kita sa lungsod. Gawas niini ang mga residente sa Minglanilla mahatagan usab unya og mga trabaho.

Kabahin sa problema sa trapiko sa lungsod, si Peña nibutyag nga magtukod og bypass road nga mokonektar sa SRP ug gikan usab sa himuong reclamation. (BANAT NEWS)