9-anyos patay sa dengue sa Lapu-Lapu

CEBU, Philippines - Laing biktima sa dengue ang namatay sa Dakbayan sa Lapu-Lapu sa niagi’ng Sabado sa Mactan Doctor’s Hospital.

Ang biktima nailhan nga si Aña Grace Anino, 9-anyos, taga Barangay Pajo ug Grade 4 sa Pajo Elementary School.

Matud sa iyaan nga si Rafaela Anino nga gidala sa tambalanan si Aña sa niagi’ng Biyernes, Disyembre 4, human nireklamo nga nagsakit ang dunggan.

“Gidala na lang sa iyahang mama sa ospital unya gipacheck-up kung naunsa iyahang dunggan then gipa-CBC ug urine unya (nibaw-an) nga low man siya og platelet,” matud ni Rafaela.

Ang ginikanan sa bata nga si Edna ug Roy nagdumili sa pagpahayag sa ila’ng nabati tungod kay sakit alang kanila ang mamatyan og anak.

Gilubong kagahapon sa alas 2 sa hapon ang bata sa Mactan Island Memorial Garden sa Marigondon. Si Aña ang ikaduha’ng bata sa barangay nga namatay tungod sa dengue human ni Gellie Patalinghug, 13-anyos, sa niagi’ng Nobiyembre.

Si Dr. Rodolfo Berame, opisyal sa City Health Office, niingon nga ang dengue prevention angayang buhaton sa matag residente sa barangay gawas sa gibuhat sa ila’ng buhatan.

Matud ni Berame nga nagpahigayon sila og misting operations sa Sitio New Paradise sa barangay kuyog si Kapitan Junard Chan apan ila’ng naabtan nga nagduwa lang og baraha ang mga residente imbis manglimpyo sa palibot.

Si Berame nagduda nga posible’ng sa tunghaan napaakan si Anino og lamok nga nagdala og dengue virus  tungod sa kahugaw sa palibot.

Gikan Enero hangtud Nobiyembre niini’ng tuiga, ang dakbayan aduna na’y 399 ka kaso sa dengue nga mas taas sa 238 nga kaso sa niagi’ng tuig 2014.

Nipahimangno si Berame sa tanang tunghaan sa dakbayan nga manglimpyo aron malikayan ang sakit sa dengue. (BANAT NEWS)