3 dagku’ng proyekto sa Naga gibuksan

CEBU, Philippines – Pormal nga gibuksan sa kagamhanan sa Siyudad sa Naga ang ila’ng tulo ka dagku’ng proyekto kagahapon sa buntag nga naglakip sa rubberized track and field oval, moderno’ng merkado ug tennis court.

Si Mayor Valdemar Chiong ang nangulo sa kalihukan.

Niabot sa P60 milyones ang gasto sa oval ug may tiwasonon pa nga grandstand nga mogasto pa og P30 ngadto sa P40 milyones.

Abli alang sa tanan ang oval nga mobayad og P10.

Si Chiong ang nanguna sa paglakaw uban sa mga nagkadaiya’ng organisasyon sa mga runners sa Sugbo.

Nasayran ang oval nahimo’ng kontrobersiyal human nibabag ang running priest nga si Fr. Robert Reyes sa pagputol sa mga kahoy.

Samtang ang moderno’ng merkado nigasto sab og P60 milyones.

Nagkanayon si Chiong nga dugang income sa siyudad ang merkado nga adunay kompleto nga kahimanan.

Laing gibuksan mao ang tennis court ug paningkamutan sa kagamhanan nga makabaton pa sila og ubang korte sa paugnat sa kusog.

Gilauman nga ang Siyudad sa Naga ang mo-host sa Central Visayas Regional Athletic Association (CVRAA) sunod tuig.  – /GMR) (BANAT NEWS)