Cellphones maoy gigamit sa cyber porn

CEBU, Philippines – Sobra sa napulo ka mga suspetsadong operasyon sa cyber pornography sa habagatan ug amihanang bahin sa probinsiya sa Sugbo ang padayong gipanid-an sa otoridad.

Kini maoy gibutyag ni  Hedda Largo, executive assistant sa Provincial Council for the Welfare of Children (PCWC).

Matud ni Largo, high- tech na ang mga naghimo niini ug inay nga mogamit kaniadto og computer karon mahimo na nila gamit ang mga android phones nga adunay internet connection.

Giangkon niya nga pinaagi niining bag-o ug modernong paagi sa mga cyber pornography operators, naglisod sila sa ilang pag-monitor apan hinayhinay na usab silang nakaapas pinaagi sa pag-upgrade sa skills sa ilang mga operatiba.

Gibutyag niya nga lakip sa giingong cyber den diha sa lungsod sa Cordova niining ulahi lang nga gironda sa National Bureau of Investigation (NBI) lakip sa ilang gipanid-an.

Apan wala pa lang makompleto ang ilang mga natigom nga mga detalye hinungdan nga wala dayon sila makapahigayon og operasyon.

Matud ni Largo nga ang bayad sa mga foreigners sa mga naghimo sa cyber pornography ipaagi gihapon sa money remittance. Bisan og ang usa ka lugar dunay ordinansa ngadto sa mga money remittance nga motabang sa pagsikop sa mga suspetsado apan dili sila daling masakpan tungod kay bisan asa man kini nga branch sa mga money remittance mahimong  makuha ang kwarta.

Sa laing bahin, gipaubos na karon sa counseling sa Department of Social Welfare and Development (DSWD)7 ang lima ka mga bata nga na-rescue atol sa pagpangronda sa Inter-Agency Council Against Trafficking didto sa sitio Talong, Barangay Cogon, lungsod sa Cordova niadtong adlaw’ng Sabado.

Kasamtangang gipaubos na sa Psych- Social Intervention ang lima ka mga bata nga na-rescue sa lungsod sa Cordova.

Duha kanila 6 anyos, samtang ang uban nagpangidaron og 8, 10 ug 14 anyos.

Duha ka mga babayeng biktima ang gipasusi sa pink room sa Vicente Sotto Memorial Medical Center aron masuta kung wala ba sila pasipad-i.

Gihulagway ni Jenneth Aquino, Social Welfare Officer sa DSWD nga dako kaayo ang epekto sa kinabuhi sa mga batang biktima sa ilang nahiaguman gikan sa 18 anyos nga kadugo ra usab kinsa maoy milawog kanila sa cyber pornography.

Gitug-an ni Aquino nga dili pa mahimong makapauli ang mga bata sa ilang mga pamilya hangtud dili mahuman ang pagproseso kanila.

Nakig-alayon na usab ang DSWD sa Department of Education aron makapadayon sa pagtungha ang mga bata bisan kung magpabilin sila sa poder sa DSWD.

Gipadayag ni Aquino nga dili rason ang kakabus sa paghimo sa krimen ug giawhag niya ang mga ginikanan nga bantayan ang ilang mga anak nunot sa sayon nga access sa internet pinaagi sa cellphone.

Ang ahensya sa DSWD naalarma karon sa paggamit sa cellphone sa mga sex-predators aron makapamiktima.

Ang suspek  ug ang kapuyo niini napasakaan na og kasong kalapasan sa Expanded Anti-Human Trafficking Act. – /EIM) (BANAT NEWS)