Gica ug Garcia nagbaharay og kiha

CEBU, Philippines – Human sa nahitabong pagpamanhig niadtong Biyernes ngadto sa Barangay Masa, lungsod sa Dumanjug ang mga residente sa lugar hangtud karon gibati og kalisang.

Giingong ang mga residente sa maong lugar dili na buot nga duna pay magpahigayon og pulong-pulong tungod kay nabalaka sila nga dunay laing insidente na usab sa pagpamanhig ang mahitabo.

Kagahapon sa hapon ang grupo ni Bise Mayor Efren Guntrano Gica sa usa ka press conference nanawagan kang Mayor Nelson Garcia nga kung tinuod wala kini kalabutan sa maong hitabo angay mosuporta kini sa mga ahensiya sa gobiyerno nga naghimo sa imbestigasyon. Ang habig ni Gica gikatakdang mopasaka og kaso batok kang Garcia ug matud ni Atty. Edgar Gica, amahan sa bise mayor nagtigom na sila og mga ebidensiya.

Kauban ni Gica ang pipila ka mga kawani sa munisipyo ug kauban sa ilang lineup ug mipadayag  sa ilang gibating kalisang niadtong tungora.

Sayo pa ang habig ni Gica mipasangil nga dunay kalambigitan ang habig ni Mayor Nelson Garcia sa maong hitabo tungod kay si Nilo Quirante giingong sakop sa mga Garcia.

Si Garcia usab sayo pa mipasangil nga ang maong hitabo sa pagpamanhig “ambush me” o drama lang sa habig nila ni Gica ug kusganong mihimakak sa pasangil batok kaniya.

Sa press conference, si Gica mipakita og video sa mga suspek sa “ambush” nga sila si Nilo Quirante  ug Amar Tiwan (pareho pang gipangita sa kapolisan) samtang nagputos og shabu ug duna say naghingos niini uban sa mga giingong drug courier.

Nakita usab sa maong video sulod sa balay sa suspetsado ang mga high powered nga mga armas. Si Garcia daan na usab mibahad nga mopasaka og kasong libelo batok kang Gica nga namasangil kaniyang protektor sa ilegal nga drugas. – /EIM) (BANAT NEWS)