Lolo nakuhaa’g P1M shabu

CEBU, Philippines – Walo ka mga tawo ang nasikop nga miresulta sa pagkasakmit sa kapin usa ka milyon ka pesos nga kantidad sa shabu ang nasakmit sa mga sakop sa City Anti-Illegal Drugs Special Operations Task Group (CAIDSOTG) sa Cebu City Police Office atol sa ilang gihimo nga drug raid operation diha sa Veterans Drive,Barangay Lahug ning Dakbayan sa Sugbo ug sa Lapu-Lapu sa managlahing operasyon.

Nasikop atol sa operasyon si Renato Cruz, 60, gihulagway nga level 2 drug pusher lakip na ang iyang gitumbok nga sinaligan nga si Noel Suson, 47.

Laing lima ka mga tawo nga gituohang manuyopay ang nasikop usab  sa kapulisan nga sila si Michael Sarmiento, 35, Albert Bircebe, 33, Jade Arcayan 18, Charlie Ormilla, 21  ug Christopher Bojos, 24.

Matud pa ni Senior Inspector Eunil Avergonzado, hepe sa CAIDSOTG nga nahinabi sa Banat News usa ka bulan diay nila nga gi- surveillance si Cruz human sila nakadawat og report sa pagbaligya niini og shabu sa lugar.

Sumala pa ni Avergonzado nga ang balay ni Cruz nahimutang atbang sa usa ka tunghaan sa elementary.

Ang mga ginikanan sa mga bata mao ang misumbong sa kapulisan human sila nasayod nga namaligya og drugas ang suspetsado.

Gamit ang P200 nga buy-bust money nakapalit og usa ka pakete sa gituohang shabu ang asset sa kapulisan hinungdan nga gironda sa mga sakop sa CAIDSOTG ang gipuy-an ni Cruz.

Sigun pa ni Avergonzado nga duna’y lima ka mga lawak ang balay sa suspek ug ang upat gihimo nga suyopanan samtang iyang gipuy-an  ug bahiganan og shabu ang usa. Atol sa pagsulod sa kapulisan sa panimalay sa suspek naaktohan pa sa kapulisan si Cruz nga nagbahig pa og drugas ang laing mga dinakpan nakit-an sa mga nagkadaiyang lawak.

Nasakmit sa kapulisan ang 35 ka gagmay nga pakete ug tulo ka dagkong putos sa shabu nga mokantidad og P1, 068, 000.

Gihulagway sa hepe sa CAIDSOTG nga idlas sa kamot sa balaod si Cruz ug gani kini anaa na sa ilang watch list.

Sa impormasyon nga nadawat sa kapulisan naggikan sa Muntinlupa ang suplay niini sa shabu.

Sa paghinabi sa Banat News sa suspetsado kini hugtanon nga mihimakak sa pasangil ug sa nakuha nga drugas apan matud niya mogamit lang siya niini apan dili mamaligya.

“Mogamit ko pero wala ko namaligya, mikalit ra man na sila og sulod, wa gyud ko kabalo kinsa nang shabu,” matud pa ni Cruz.

Samtang P96 mil nga kantidad sa gituohang shabu ang nasakmit sa Sitio Iba, Barangay Basak dakbayan sa Lapu-Lapu sa miaging Lunes sa gabii nga miresulta sa pagkasikop ni Lou Amores, 39.

Si Amores nadakpa sa grupo ni Police Inspector Alcon Escusora, hepe sa Basak-Marigondon Police Station 4 pinaagi sa gipahigayon nga buy-bust operation.

"Idlas kaayo ni siya, di magpadakop og buhi. Mosukol gyud pero naunhan man sa atong polis," matud ni Escosura.

Si Amores nasayrang nalakip sa "Top Ten Drug Personalities" sa Basak-Marigondon Police Station 4.

Nasakmit sa kapolisan ang unom ka gagmay’ng putos ug tulo ka medium pack sa gidudahang shabu ug ang P900 nga kwarta nga gituohang halin sa ginadiling drugas ug ang P400 nga buy-bust money gikan ni Amores.

Nakuhaan usab si Amores og usa ka .45 caliber pistol nga dunay lima ka  bala  nga matud pang Escusora gamiton sa suspetsado panghadlok sa iyahang mga kostumer. – /EIM) (BANAT NEWS)