Opisyal sa CENRO nanion og taxi driver

CEBU, Philippines - Nidangop sa Banat News ang usa ka taxi driver human matud pa gitionan og armas sa usa ka opisyal sa Community Environment and Natural Resources Office kagahapon sa buntag.

Si Edsel Arnoco, 42-anyos, driver sa Worldwide Taxi, residente sa General Maxilom Extension, Dakbayan sa Sugbo, ang gibati og kakuyaw human giingong gitionan og kalibre .45 nga pistola sa iya’ng ulo sa usa ka opisyal sa Forest Management Section sa CENRO kinsa’ng pangan gipugngan una samtang wala pa nakuhai sa reaksiyon. Pasado alas 5 kagahapon sa buntag matud ni Arnoco nga nisakay sa iya’ng taxi ang asawa sa opisyal ug nagpahatud sa ila’ng panimalay. Apan giingong nasuko kini human siya nihangyo nga dili lang ipasulod sa eskina sa ila’ng pinuy-anan ang taxi tungod kay dead-end ang karsada ug wala’y kabakingan.

Sa diha’ng nikanaug na ang asawa ug gipaabot nga kini moplete, sigun sa taxi driver nga nikaway niya ang gireklamo hinungdan nga iya kini’ng giduol sa pagtuo nga kini mobayad sa pletehan nga P260. Apan giingong kalit lang nga nisaka ang suspek ug sa pagbalik niini nagbitbit na og armas dayon kasa ug gition ngadto niya hinungdan nga siya nagpakiluoy ug nihangyo nga sabuton lang ang problema. Tungod sa hitabo, dali’ng nagpakitabang sa Barangay Hall sa Inayawan si Arnoco diin sa iya’ng pagbalik sa panimalay sa suspek, aduna na kini’y kauban nga duha ka polis.

Apan imbes mangayo og pasaylo, giingong gihulga pa siya nga patyon.  (BANAT NEWS)