Duke: ngAno’ng karon lang?

CEBU, Philippines - Nakapangutana si Liloan Mayor Vincent Franco “Duke” Frasco kun ngano’ng karon lang moreklamo si Bise Mayor Lucelito Pilapil sa scholarship program nga kauban man sila nga nipatuman niini sukad niadto’ng 2007.

Ang pangutana nitumaw isip reaksiyon ni Frasco sa gipasaka’ng reklamo ni Pilapil sa Hunta Probinsiyal sa Sugbo.

Si Frasco nipahimangno nga ang 2,400 ka scholars ug ang mga ginikanan niini ang maipit sa politikanhong motibo ni Pilapil sa pagpasaka sa kaso.

Matud ni Frasco nga wala hinuon siya pasanginli og kurapsiyon kun dili ang pamaagi sa paghatag sa pundo ang gikuwestiyon ni Pilapil.

Moabot na sa 6,000 ka tinun-an ang nakapahimulos sa scholarship program ni Frasco diin apil nga niaprobar niini ang konseho sukad niadto’ng 2007 lakip na si Pilapil.

Nakugang na lang si Frasco sa lakang ni Pilapil sanglit karon lang kini nireklamo nga giaprobahan man kini sa konseho samtang si Pilapil ang presiding officer.

Gihulagway ni Frasco ang reklamo ni Pilapil nga malisyuso ilabi na nga unom ka buwan na lang ang nahabilin sa dili pa ang piniliay.

Matud ni Frasco nga buot si Pilapil masuspenso siya sa dili pa ang eleksiyon aron siya na ang acting mayor.

“Dili na seguro siya kahuwat,” matud ni Frasco.

Si Pilapil sa Liberal Party ang ikaatbang sa pagka-mayor sa asawa ni Frasco nga si Atty. Christina Garcia-Codilla Frasco, anak ni kanhi gobernador Gwendolyn Garcia, ubos sa One Cebu.  (BANAT NEWS)