‘Notado’ng pusher’ sa Buaya nasikop
CEBU, Philippines - Nasikop sa kapolisan sa Dakbayan sa Lapu-Lapu ang usa ka lalaki nalambigit sa pagpamaligya og ginadili’ng drugas sa Sitio Buaya, Barangay Buaya sa niagi’ng Sabado sa gabii.
Si Billy Paredes Nadado, 45-anyos, residente sa mao’ng dapit ang gidakop pinaagi sa buy-bust operation sa Pusok Police Station 5 alas 10:25 sa gabii sa usa ka gamay’ng lugar suyopanan sulod sa mao’ng barangay.
"Noted na siya nga na-involve sa drug selling didto ug nadakpan na namo siya (Nadado) didto sa usa ka shanty. Mura siya'g gamay nga suyopanan didto," matud ni SPO4 Jose Ruel Nalzaro.
Nakuha ang siyam ka gagmay’ng putos og usa ka medium packed sa gituohang shabu gikan sa posisyon ni Nadado human nakigtransaksiyon sa usa ka police poseur buyer niadto’ng orasa.
Kapin sa P6,000 ang estimated street value sa shabu, matud ni Nalzaro.
Nakuha sab sa kapolisan ang P300 nga gikataho’ng halin sa nasakmit nga shabu og drug paraphernalia samtang narekober nila ang marked money nga P200.
Gibalhug na sa detention cell sa Pusok Police Station 5 ang suspek.
Sa niagi’ng semana, duha ka lalaki ang nasikop sulod sa usa ka adlaw sa managlahi’ng operasyon batok ilegal nga drugas nga nikantidad og kapin sa P300,000.
Ang mga suspek mao sila si Jose Waminal, 39, usa ka habal-habal driver nga nagpuyo sa Sitio Ka-Isko, Barangay Mactan ug si Jed Avila, 31, residente sa Sitio Sacred Heart Village, Barangay Gun-ob, kinsa pulos na gipangkasuhan. (BANAT NEWS)
- Latest
