Mayor sa dumanjug modawat?

CEBU, Philippines - Ang mayor sa Dumanjug nga si Nelson Garcia gipasanginlan sa iyang bise mayor nga nagdawatan og labing menos P40 mil ang semana gikan sa mga druglord nga nag-operate sa ilang lungsod.

Matud ni Dumanjug Vice Mayor Edgar Gica nga mao kini ang rason nga si Garcia mopahulip dayon sa mga hepe sa kapolisan sa ilang lungsod kun aktibo kini sa kampanya sa drugas.

Sa pakighinabi sa mga reporters didto sa Cebu Provincial Police Office (CPPO) kagahapon, si Gica nagkanayon nga adunay kanhi druglord nga nag-operate sa Dumanjug, nga karon nagbag-o na, andam motug-an kinsa ang nagproteher sa negosyo sa drugas sa ilang lungsod. Apan si Mayor Garcia abtik kaayo nga nakapanghimakak sa pasangil sa iyang bise mayor. Matud ni Garcia nga basin og si Gica ra maoy nagdawatan og suborno gikan sa mga druglords.

Si Garcia ug Gica magsangka pagka mayor sa Dumanjug sa eleksyon karong sunod tuig. Si Gica maoy kandidato sa Partido Liberal samtang si Garcia sa One Cebu Party.

Kaniadtong Biyernes girakrakan og mga bala ingon man gitirahan og rifle grenade ang convoy nila ni Gica ug kaubanang kandidato nga gikan naghimo og pulong-pulong didto sa Barangay Masa, bukid nga barangay sa Dumanjug.

Ang sakyanan nga iya ni kanhi Konsehal Rene Asentista, ang kandidato ni Gica pagka bise mayor, maoy natusak-tusak sa mga bala ug naguba kay maoy naigo sa rifle grenade.

Apan si Mayor Garcia mipasangil nga nagbuhat-buhat ra si Gica og drama nga siya gi-ambush aron makakuha og sentimento sa mga lumolupyo.

Tulo ka tawo ang nadakpan sa kapolisan atol sa follow-up operations ug ang duha kanila nasakmitan og mga armas, granada ug mga pinakete nga shabu. Ang usa giingon nga maoy lookout sa grupo. Silang tulo ka dinakpan gipasakaan na og kaso didto sa piskaliya kagahapon.

Samtang si Mayor Garcia moadto sa National Bureau of Investigation (NBI) kagahapon ug miawhag nga ang NBI mohimo unta og ilang pakisusi kabahin sa hitabo.

Kini tungod sa iyang pagduda nga “ambush me” ang gikataho nga pagpamanhig sa grupo sa bise mayor nga higpit niya karon nga kontra sa politika.

Si Gica usab miadto kagahapon sa opisina ni CPPO director Noel Gillamac aron sa pagpangayo og police escort tungod sa kabalaka nga kadtong wala pa madakpi mangita pa og paagi nga siya mapatay.

Matud ni Gillamac nga ang hangyo ni Gica iyang iduso ngadto kang Police Regional Office (PRO)-7 director Prudencio Tom Bañas aron kahimoan og aksiyon.

Si Election Officer Ferdinand Gujilde mibutyag nga wala pa nila maanalisar kun angay ba nga ang Dumanjug madeklarar nga election watch-list area (EWA).

Gipasabot ni Gujilde nga kun ang usa ka lugar madeklarar sa polis, military ug Comelec nga EWA atol sa election period, ang mga polis ug militar motutok gyud sa maong dapit aron paglikay sa mga panghitabo.

Si Mayor Garcia nagkanayon hangyoon niya si Gillamac nga relibohan si Arbuis tungod kay nagduda siya nga bayas kini pabor sa iyang bise mayor.  (BANAT NEWS)