Anak gidunggab sa papa

CEBU, Philippines – Kritikal ang kahimtang sa usa ka anak nga gidunggab pag-unay sa iyang amahan tungod kay gikulata niini ang iyang inahan diha nga miuli siya sa ilang panimalay nga hubog.

Didto kini mahitabo sa Sitio Anapog, Barangay Tinubdan, lungsod sa Daanbantayan kaniadtong Sabado sa hapon.

Si Jason Arriesgado, 31, minyo anaa karon sa ospital samtang ang iyang amahan nga si Jose, 50, gitanggong pa sa kapolisan.

Matud pa nga nag-wild si Jason nga mipauli sa ilang panimalay tungod sa kahubog ug gisukmag ang iyang inahan. Ang amahan misuway unta pagbadlong, apan siya na usab ang giatubang ug gisukmag sa nawong.

Sa kalagot sa amahan, mikuha kini og kutsilyo ug gihansak sa buko-buko sa iyang anak.

Si PO3 Victor Avenido sa Daanbantayan Police Station miingon nga ilang paaboton kutob karong adlawa kun mopasaka ba og kaso ang tagtungod batok sa amahan.

Matud ni PO3 Avenido nga kun wala’y kaso nga mapasaka hayan ila ra usab kini nga buhian.

Samtang sa dakbayan sa Sugbo, patay ang usa ka 38-anyos nga lalaki human kini gidunggab sa iyang silingan didto sa Sitio Siaboc, Barangay Bulacao kaniadtong Sabado sa buntag.

Ang biktima giila nga si Leo Salonoy, ulitawo, nagpuyo sa maong dapit, tindero og utanon samtang gitumbok nga midunggab kaniya mao si Rowie Cañada, 30, minyo.

Matud pa ni PO3 Jerry Genelaso, imbestigador sa homicide section sa Cebu City Police Office nga  personal nga motibo ang ila karon nga gitutokan sa krimen.

Sumala pa ni Genelaso nga ang suspetsado hilig diay kaayo nga “mopalit” og away sa iyang mga higala ug si Salonoy malagmit nga maoy gikakontra.

Nasayran nga samtang naglakaw si Salonoy sa usa ka sudlonon nga dalan sa maong dapit, kalit lang kini nga giatangan sa suspetado ug gihansakan og kutsilyo sa dughan.

Patay na ang biktima diha nga miabot kini sa Vicente Sotto Memorial Medical Center (VSMMC). Padayon pa nga gipangita sa kapolisan si Cañada nga dali usab kaayo nga misibat human sa hitabo. – /RUB) (BANAT NEWS)