Kapin 10 mil na nagparehistro sa IEC
CEBU, Philippines – Niabot na sa 10,154 ka tawo ang nagpa-rehistro nga delegado sa International Eucharistic Congress kutob niadto’ng Disyembre 1.
Adunay pagsaka nga 780 ang nagparehistro sukad sa nilabay’ng semana.
Ang secretary-general sa IEC 2016, Auxiliary Bishop Dennis Villarojo, malaumon nga mosaka pa ang gidaghanon sa buot moapil sa kalihukan nga ipahigayon sa Pavilion nga nahimutang sa Pope John Paul Avenue, Dakbayan sa Sugbo.
Nag-una sa gidaghanon ang mga Filipino ug gisundan sa taga Taiwan, Amerika, Canada, Hong Kong, Australia, Thailand, China, India ug Vietnam.
Samtang mopakatap ang Philippine Red Cross-Lapu-Lapu/ Cordova Chapter og mga emergency responders atol sa duha ka adlaw nga Youth Day sa IEC nga ipaghigayon sa Hoopsdome.
Nagkanayon si Vicjay Gonzal, chapter service representative sa PRC, nga adunay 50 ka on-call volunteers sa ila’ng grupo ug laing 200 ka volunteers gikan sa mga eskwelahan ug mga pribado’ng kompaniya ang ipakatap. Mangabot ang mga delegado sa Enero 27 diin usa ka welcome dinner ang ihatag kanila sa unom ka parokya sa dakbayan.
Samtang wala pa’y giluwatan nga traffic route ang City Traffic Management Systems sa dakbayan tungod kay kinahanglan pa sila makig-coordinate sa Dakbayan sa Mandaue.
Ang “Jericho Walk” moagi sa Mandaue-Mactan Bridge paingon sa Mandani Bay sa North Reclamation Area sa Dakbayan sa Mandaue. (BANAT NEWS)
- Latest
