Dugang budget alang sa paghipos sa basura

CEBU, Philippines – Usa ka konsehal nga alyado sa Team Rama misugyot nga ang wala magasto nga calamity budget sa dakbayan sa Sugbo sa tuig 2011, 2012 ug 2013 nga mokabat pa og P29.9 milyones gastohon kini pagbayad sa paghakot sa basura.

Si Konsehal Noel Eleuterio Wenceslao miingon nga gitugot sa balaod nga ang maong salapi mahimong gastohon sa lain nga katuyoan kun hatagan lang og permiso sa Cebu City Council.

Pagka karon, ang dakbayan sa Sugbo giingon nga nahutdan na sa budget nga alang sa pagpahakot ug sa paglabay sa mga basura didto sa pribadong landfill sa lungsod sa Consolacion.

Sukad kaniadtong Enero, ang City Council nakapagahin na og P101 milyones mao nga dili makatuo ang mga konsehal nga alyado sa BOPK nga nahurot na ang mao nga gahin. Si Mayor Michael Rama miduso og laing P87 milyones nga budget alang gihapon sa garbage tipping fee apan ang Supplemental Budget No. 1 wala pa aprobahi sa City Council.

Ang Local Finance Committee miduso na usab og Supplemental Budget No. 2 ug gisukipan na usab og laing P50 nga gahin alang gihapon sa garbage tipping fee.   

Kining gahin nga gisugyot ni Konsehal Wenceslao lahi usab kini nga kantidad ug nakapasamot sa pagduda sa ubang konsehal ngano nga daku man ang gisugyot nga budget sa paghipos sa basura nga hinapos na man unta ang tuig.

Matud ni Konsehal Margarita Osmeña, tsirman sa Committee on Budget and Finance sa City Council, nga ang giduso nga Supplemental Budget No. 2 diskutihon nila sa special session ugmang adlawa.  (BANAT NEWS)