OFW gi-blackmail sa uyab human nga gibuwagan

CEBU, Philippines - Usa ka Cebuana nga Overseas Filipino Worker (OFW) gipakauwawan sa iyang uyab pinaagi sa pag-post sa iyang mga hubo nga hulagway diha sa Facebook.

Matud pa nga ang uyab sa OFW nagpaila nga usa ka sundalo mao nga ang mga sakop sa Anti-Cybercrime Group-7 makigtambayayong sa kadagkoan sa Camp Aguinaldo aron mailhan ang suspek.

Matud ni Senior Inspector Michael Vertudazo sa ACG-7 nga ang manghod sa OFW maoy miduol kanila ug nagpakitabang nga makuha unta ang mga law-ay’ng hulagway nga gibutang sa Facebook Account sa iyang maguwang.

Ang OFW nga taga Barangay Mambaling nagkaila ug ang lalaki nga nagpaila nga sundalo diha lang sa Facebook. Usa ka tuig na sila nga uyab apan wala pa gyud sila magkita.

Tungod sa ilang kasuod na, nagtug-anay sila sa tagsa-tagsa nila ka password sa Facebook. Tungod sa kaseloso sa lalaki, gibulagan sa OFW ang iyang uyab.

Matud pa nga didto na mihulga ang lalaki nga pakaulawan siya diha sa social media. Ang OFW nga nahinabi ni Vertudazo miingon nga ang uban sa mga hulagway nga hubo dili siya.

Si Vertudazo miingon nga usa sa ilang himoon mao ang paghangyo sa Facebook Company nga matangtang kadtong mga bastos nga hulagway sa account sa OFW.

Ang gihimo sa giingong uyab sa OFW usa ka kalapasan sa anti-cyber crime law, apan wala pa usab matataw kun ang OFW mopasaka ba og kaso batok sa kanhi niya uyab.

Giawhag ni Vertudazo ang katawhan nga dili gayud basta-basta nga mosalig ni bisan kinsa ug dili itug-an ang ilang mga password sa Facebook aron nga dili kini kaabusohan. (Jojo C. Ugdol/RUB)

Daghang HIV positive nagtago-tago na

Adunay 75 ka tawo dinhi sa Sugbo nga natakboyan og Human Immuno-Deficiency Virus (HIV) dili na karon makontak pa sa mga sakop sa Aids-Free Philippines ug gikabalak-an nga sila makapakatap sa maong mananakod nga sakit.

Si Dr. Rene Josef Bullecer, director sa Aids-Free Philippines, miingon nga wala na nila makontak pa ang maong mga tawo aron unta matan-aw kanunay ang ilang panglawas.

Nagtuo si Bullecer nga ang uban kanila nagtago-tago na ug nag-usab sa ilang mga contact number ug mibalhin sa laing pinuy-anan, o kaha namatay na.

Base sa talaan miabot na og 26,904 ka tawo ang natakboyan og HIV, diin nag-una niini nakuha pinaagi sa Homosexual Sex (61 %), Bisexual Sex (23%), Heterosexual sex (9.8 %), Intravenous Drug Users (3.8 %), ug Blood Transfusion Recipients (0.5 %).

Matud ni Bullecer nga niining tuiga, 10 na ang namatay sa Aids dinhi sa nasud. Giawhag ni Bullecer nga ang katawhan angay’ng maglikay gyud, sama sa dili pagbaton og daghang sex partners ingon man paggamit og dagom sa injection nga ginamit na sa laing tawo. (Rowena D. Capistrano/RUB)(BANAT NEWS)