SB2 na sab ang tukion sa konseho
CEBU, Philippines - Dul-an sa P200 milyones ang giduso ni Cebu City Mayor Michael Rama nga Supplemental Budget 2 human gipadaplin sa konseho sa dakbayan ang kontrobersiyal nga SB1.
Nalakip niini ang incentives sa singko mil ka kawani sa Cebu City Hall ug P50 milyones alang sa pagkolekta ug paglabay sa basura.
Si City Administrator, Dr. Lucelle Mercado, niingon nga magpaabot sila nga aduna’y special session ang konseho aron matuki ang SB2.
Matud ni Mercado nga savings sa dakbayan ang kuhaan sa tinubdan sa budget tungod kay adunay igo’ng kwarta ang dakbayan.
Ang paggamit sa halin sa luna sa South Road Properties nga nalakip sa SB1 maoy rason nga mayoriya sa mga konsehal ang wala nitugot niini.
Makadawat og tag P30,000 matag kawani, regular man o casual, isip incentive kun maaprobahan ang SB2.
Si acting Mayor Edgardo Labella nipasabot nga pwede ra moduso ang executive department og SB2 bisan wala pa aprobahi ang SB1.
Nanghinaut si Labella nga maaprobahan ang SB1 tungod kay nalakip niini ang Productivity Enhancement Incentives (PEI) sa mga kawani sa City Hall. Gihangyo ni Labella ang konseho sa pag-deliberate sa SB2 ug magpahigayon og special session karong Lunes. (BANAT NEWS)
- Latest
