630 kilong pinabuthang isda nasakmit

CEBU, Philippines - Mokabat 630 ka kilong pinabuthang isda na usab ang nasakmit sa Cebu Provincial Anti-Illegal Fishing Task Force (CPAIFTF) kagahapon sa kaadlawon diha sa lungsod sa Carmen.

Ang hepe sa CPAIFTF nga si Mar Go mibutyag nga ilang gi-impound ang Isuzu closed van nga nagtangag sa plakang TMP-431 gikan sa Barangay Mahawak, lungsod sa Medellin paingon unta sa Pasil, Dakbayan sa Sugbo.

Ang tag-iya sa sakyanan giingong taga Barangay Mahawak wala una gibutyag ang pangalan samtang wala pa kini makapadayag sa iyang pamahayag.

Ang task force nagpahigayon og check point diha sa lungsod sa Carmen dihang ilang napara ang maong trak nga adunay sakay nga lima ka tawo lakip ang usa ka babaye.

Matud ni Go nga 28 ka kahon nga mga isda ang gipaubos sa eksaminasyon sa fish examiner sa Kapitolyo nga si Rodelio Codilla  ug nasuta nga siyam niini pinabuthan.

Ang maong mga isda gilangkuban sa Tabangko, Dalagang-Bukid, Miransing ug Badlon ug gipangapud-apod ngadto sa balay dangpanan samtang nakuha sa legal nga paagi giuli ngadto sa tag-iya.

Matud ni Go nga giimbitar nila ang nahisgutang lima ka tawo alang sa imbestigasyon ug pagkahuman gitugotan sila nga makalakaw.

Ang report isumitir nila ngadto sa Fisheries and Aquatic Resources Adjudication Board alang sa imbestigasyon.

Ubos sa balaod gidili ang pagbiyahe ug pagbaligya sa mga isda nga nakuha ubos sa ilegal nga paagi. Lakip sa silot sa nakalapas sa balaod sa fisheries makamulta kini og P50,000 ngadto sa P200,000 o lima ka pilo sa presyo sa isda nga nakuha sa ilegal nga paagi.

Kun makombikto , mahimo silang masilotan pagkapriso gikan sa unom ka buwan ngadto sa duha ka tuig ug makabayad og multa nga P100 mil ngadto sa P500 mil. (BANAT NEWS)