Trak natagak sa bung-aw di na makuha

CEBU, Philippines - Nahagbong sa bung-aw ang usa ka Isuzu Canter pasado alas singko niadto’ng Martes sa hapon sa Lower Busay, Dakbayan sa Sugbo.

Matud ni Konsehal Kevin Sanchez sa Barangay Busay Risk Reduction and Management Council nga milagro kaayo’ng nakalingkawas sa tino’ng kamatayon ang driver nga si John Rey Abelle, 32, ug ang pahinante niini nga si Julius Tac-an, 23-anyos, human nakalayat sa sakyanan.

Gikan sa Lungsod sa Balamban ang sakyanan ug kalit nawagtangan sa brake ug nidaro sa kahoy hinungdan nga dali nga nilayat ang mga sakay una kini natagak sa bung-aw.

Ang operations chief sa Cebu City Transportation Office nibutyag nga imposible na’ng maugkat ang sakyanan gikan sa nahulgan tungod sa kalisud ug kalawom sa nahimutangan.

Gibutyag ni Tumulak nga lisud kaayo ang agianan padulhog ug pasaka pagbalik tungod sa katitip sa pangpang nga agianan ug dunay posibilidad nga pisa-pisahon na lang ang sakyanan aron makuha gikan sa nahulgan. (BANAT NEWS)