1 balay nasunog, P120 mil danyos

CEBU, Philippines - Naugdaw gyud sa sunog nga nahitabo ang usa ka panimalay sa Looc, Poblacion, Lungod sa Liloan alas 6:49 sa Lunes sa gabii.

Si Fire Officer 3 Reo Donaire sa Liloan Fire Station niila sa panimalay nga nasunog nga gipanag-iya ni Leo Pepito nga ginama sa mix materials.

Matud ni Donaire nga nagsugod ang sunog sa outlet sa sala ug dali nga nitapon sa kinatibuk-ang bahin sa panimalay nga nakaingon sa pagkaugdaw niini.

Hinuon wala nakatapon sa kasikbit nga mga panimalay ang kayo kay dali kini nga napugngan.

Nikatap na unta sa balay sa inahan ni Pepito nga si Erlinda ang kayo apan naluwas sa kabomberuhan.

“Bag-o ra man gud ni gitukod ang balay ni Leo ug mikab-it lang siya sa wire sa iya’ng mama. Mahug nga overload of electricity connection ang hinungdan niini,” sumala pa ni Donaire.

Si Donaire niingon nga mokabat sa P120 mil ang gibanabana nga danyos ug wala’y naangol o kinabuhing nakalas atol sa hitabo. (BANAT NEWS)