120 ka nasud ipasundayag sa Sinulog

CEBU, Philippines - Moabot sa 120 ka mga nasud ang ibida sa umaabot nga Grand Finale sa Sinulog Grand Parade nga ipahigayon dinhi sa Dakbayan sa Sugbo subay sa kapistahan sa Balaan nga Bata nga si Senyor Sto. Niño.

Ang executive director sa Sinulog Foundation Ricky Ballesteros, nibutyag nga andam na sila karon sa umaabot nga Sinulog nga unang higayon nga pangkalibutanon ang tema.

Buot nilang ipakita sa katawhan ang nagkadaiyang performance sa mga kanasoran sa tibuok kalibutan subay sa pag-awit sa opisyal nga theme song ang Cebu branding nga mao ang Celebrate Cebu.

Matud pa ni Ballesteros, gituki na nila sa mga panagtigom ang seguridad ug kalinaw sa siyudad sa maong adlaw.

Gipahibalo ni Ballesteros nga aduna nay pito ka mga out of town contingents ang mipadayag nga moapil sa maong kalihukan nga naglangkob sa duha gikan sa Masbate, Panglao, Bohol; Tangub City, Abuyog, Leyte; Province of Bohol ug Province of Lanao Del Norte.

Gipaabot ni Ballesteros nga daghan pa ang magpalista tunga-tunga na sa buwan sa Disyembre.

Si Ballesteros nipadayag nga makig-alayon usab sila sa mga tagdumala sa mga dagkong malls sa siyudad alang sa pagpahigayon nila og fireworks display sa maong adlaw.

Gipahibalo usab ni Ballesteros nga andam na ang ilang mga tickets nga miabot og 10,600 ka buok dala na sa mga VIPs ug sugdan kini pagbaligya sugod Disyembre 15 sa kantidad nga P1,000, P1,500 ug P2,500. (BANAT NEWS)