Higanteng Christmas Tree sa Fuente simbolo sa paglaom

CEBU, Philippines - Panaghiusa, kalipay ug pag-ampo panahon sa Pasko maoy angay nga ipatigbabaw matud pa sa mensahe ni Vice Mayor Edgardo Labella sa Dakbayan sa Sugbo atol sa pormal nga pagpasiga sa higanteng Christmas Tree diha sa Fuente Osmeña Circle niadtong Martes sa gabii.

Ang designer sa maong Christmas Tree nga si Nonoy Adiong ginganlan ang iyang hinimo nga “A tree of Hope” ug ang kolor nga puti niini nagsimbolo sa paglaom, kaputli, panaghiusa ug kalinaw.

Si Adiong usa ka retiradong designer nga taga Bais City opisyal nga gikuha sa managtiayong French Consul Michel ug Dr. Amparito Lhuillier aron modesinyo niini sukad pa sa pagsugod niini pipila ka tuig na ang nilabay.

Matud ni Michel gisuwayan nga usbon ang desinyo apan ilang gipili nga magpabilin kini nga Tree of Hope niini nga mga kolor aron magsimbolo sa paglaum sa katawhan sa mga umaabot nga mga katuigan.

Migastos ang mga Lhuillier sa maong Christmas Tree og P1.5 milyones nga adunay kapin 200 ka mga bitoon o parol. Ug kini dili tangtangon hangtud di mahuman ang International Eucharistic Congress sunod buwan.

Sa laing bahin, gibutang ni Chief Superintendent Prudencio Bañas sa heightened alert ang Police Regional Office-7 aron paghatag sa seguridad sa katawhan niining panahona.

Gimando ni Bañas nga kinahanglang atoa ang kadaghanan sa mga polis sa karsada aron magbantay.

Samtang ang hepe sa Regional Intelligence Division-7, Supt. Rex Derilo miingon nga napaabot na usab ang maong kamanduan sa mga special units sa lalawigan aron maniid batok sa mga grupo sa mga kriminal. (BANAT NEWS)