Kanhi mga opisyal sa GSIS gikiha

CEBU, Philippines - Gipasaka sa Ombudsman ngadto sa Sandiganbayan ang kaso’ng graft batok sa 11 ka kanhi opisyal sa Government Service Insurance System (GSIS) nunot sa giingong anomaloso’ng e-Card project niadto’ng 2004. Ang mga gipasakaan mao sila si Atty. Winston Garcia, president; Enriqueta Disuanco, executive vice president for operations; Benjamin Vivas Jr, senior vice president for information technology; ug retired Supreme Court Justice Hermogenes Concepcion Jr, chairman of the board of trustees.

Lakip sa gikiha ang kanhi GSIS trustees nga sila si Elmer Bautista, Fulgencio Factoran, Florino Ibañez, Aida Nocete, Reynaldo Palmiery, Elenita Tumala-Martinez, ug Leonora Vasquez-de Jesus.

Apan matud ni Garcia kinsa kandidato sa pagka-gobernador sa Sugbo sa umaabot eleksiyon nga ang pasangil gibase lang sa sayop nga report sa Commission on Audit (COA) Special Audit Team.

Giingong gilapas ang balaud sa public bidding sa proyekto ug nahikawan ang Land Bank sa kita unta niini sa mga transaksiyon.

Matud ni Garcia nga kapin na sa napulo ka tuig ug karon lang gilihok sa Ombudsman nga nagkaduol na ang eleksiyon sunod tuig.

Giklaro ni Garcia nga ang gikwestiyon nga eCard project sa Union Bank maoy gipadayon sa kasamtangang namunoan sa GSIS apan wala gikwestiyon sa COA.

Masaligon si Garcia nga makalingkawas ra sila sa kaso karon nga anaa na sa Sandiganbayan. (BANAT NEWS)