Tambalanan tagdon ni klasmit Boyet

CEBU, Philippines - Usa sa hatagan og pagtagad sa media personality nga si Roliveth “Klasmit Boyet” Cortes kung mapiling gobernador ang serbisyo sa mga tambalanan sa probinsiya sa Sugbo.

Matud niya nga doblehon niya ang budget alang sa health services ug edukasyon samtang ang inprastraktura hatagan usab niya og daku-daku nga budget.

Naobserbahan ni Cortes nga ang mga tambalanan sa probinsiya kuwang sa tambal hinungdan nga ang mga pasyente sa kalungsuran ibiyahe pa paingon sa Vicente Sotto Memorial Medical Center (VSMMC).

Gikwestiyon usab ni Cortes ang paghatag sa Kapitolyo og pundo sa VSMMC nga may pundo na man kini sa nasudnong kagamhanan.

“Pagka-daku’ng bali! Nationally-funded? Unya ang provincial government nga suppose to receive a national support mao pa man hinuon ang mohatag og kwarta ngadto sa nationally-funded,” matud ni Cortes.

Hinuon, matud ni Cortes nga ang administrasyon karon ni Gobernador Hilario Davide III ug kanhi gobernador Gwendolyn Garcia adunay nahimo’ng maayo ug dili lang sad pulos wala’y kaayuhan.

Matud niya kadto’ng mga maayo nga programa sa administrasyon karon nga nakahatag og kaayuhan sa katawhan iya’ng padayunon apan kadtong dili maayo iya’ng usbon.

Gipasabot ni Cortes nga ang kauswagan sa probinsiya maoy iya’ng unahon.

Subay niini, matud ni Cortes nga kung hatagan siya og kahigayunan maputol na ang political dynasty diin magsugod sa Sugbo ang mao’ng kausaban. (BANAT NEWS)