Torres nangayo og rekonsiderasyon
CEBU, Philippines – Niduso og motion for reconsideration si Atty. Romulo Torres human gibasura sa korte ang iya’ng gisang-at nga petisyon batok sa pagbaligya sa luna sa South Road Properties.
Pinaagi ni Atty. Janice Lape, si Torres nisang-at sa mosyon niadto’ng Biyernes sa hapon sa sala ni Regional Trial Court Branch 9 Presiding Judge Alexander Acosta kinsa nibasura sa iya’ng petisyon niadto’ng Nobiyembre 18, 2015.
Matud ni Torres nga ang paghunong sa konseho sa Dakbayan sa Sugbo sa pagtuki sa Supplemental Budget No. 1 samtang pending pa ang kaso mao’y kamatuoran nga adunay kontrobersiya ang pagbaligya sa dakbayan sa luna sa SRP.
Iya usab gipasabot nga ang resolusyon nga nagtugot kang Mayor Michael Rama sa pagbaligya sa Lot No. 8 sa SRP nahasupak kini sa ordinansa nga nagdili sa pagbaligya sa luna sa SRP.
Gibasura ni Acosta ang kaso nunot sa giingong wala’y basehanan ang argumento ni Torres batok sa konseho.
Nunot niini si Cebu City Legal Council Atty. Jerome Castillo niingon nga wala na’y rason ang konseho nga dili tukion ang Supplemental Budget No.1.
Apan si Konsehal Sisinio “Bebz” Andales sa iya’ng bahin nagkanayon nga dili pa gihapon angay tukion ang SB 1 tungod wala pa’y final judgment nunot sa motion for reconsideration nga giduso ni Torres.(BANAT NEWS)
- Latest
