Traffic sa SRP naarang-arang
CEBU, Philippines – Miarang-arang na ang dagan sa trapiko diha sa South Road Properties (SRP) sa ikaduhang adlaw sukad sa pag-abli sa bag-o nga SM Seaside nga nimugna og grabeng problema sa trapiko sa unang adlaw niini niadtong Biyernes.
Matud ni Cebu City Transportation Office Executive Director Atty. Rey Gealon nga light to moderate na ang dagan sa trapiko diha sa SRP.
Dugang pa ni Gealon nga usa usab nga dugay nakalugar ang mga sakyanan tungod kay walay kaparkingan.
Aduna nay kasabotan ang SM ug CCTO nga kinahanglang makasulod ang mga sakyanan nga adunay tuyo sa maong mall ug dili maglaray diha sa gawas sa karsada.
Sa pagkakaron, gihimong parkingan ang usa ka bahin sa luna nga gitukoran sa San Pedro Calungsod Ground.
Gihangyo ni Gealon ang katawhan nga patas-an ang pasensya tungod sa pagdagsa sa mga tawo paingon sa SM nga ilaha usab gipangitaan og solusyon.
Hinuon adunay gipang-deploy nga 20 ngadto sa 30 ka traffic enforcers sa kadalanan diha sa SRP aron pagmando sa trapiko. – /EIM) (BANAT NEWS)
- Latest
