Ilegal swertres sa Minglanilla gironda
CEBU, Philippines – Gironda sa kapolisan ang lima ka barangay sa lungsod sa Minglanilla diin nakita nga may ilegal nga swertres outlet niadto’ng nilabay nga adlaw sulod lang sa lima ka oras.
Si Chief Insp. Franco Oriol, hepe sa kapolisan sa lungsod, nagkanayon nga ila’ng gihingusgan karon ang kampanya batok sa ilegal nga sugal.
Kini human nangreklamo na ang mga barangay kapitan kalabot sa pagtumaw sa mao’ng matang sa sugal.
Si Concordio Mejias, municipal administrator, nipaabot usab sa reklamo sa mga kapitan ngadto sa mga tigbalita.
Una’ng gisulod nila ni Oriol ang Barangay Tungkil ug gisunod ang Tungkop, Tulay, Tunghaan ug Pakigne.
Ang nangadakpan pulos mga tigbantay sa mga outlet nga sila si Mave Garcia,18; Jaymark Palyaso,25; Cassandra Blanco,18; Joy Seguerra,19 ug Marie Martinez, 23, kinsa nakuhaan og mga gamit para sa sugal ingon man ang ila’ng kita.
Matud ni Oriol nga daghan pa unya nga mga ilegal swertres outlets ang madakpan hinungdan nga iya’ng giawhag ang mga operators nga moundang na. (Gabriel C. Bonjoc/GMR)(BANAT NEWS)
- Latest
