Traffic sa SRP nigrabe

CEBU, Philippines – Daghang mga sakyanan ang nalangay sa ilang biyahe ug daghang nagbaktas tungod sa pagdagsa sa mga tawo sa unang adlaw sa pagbukas sa SM Seaside diha sa South Road Properties kagahapon.

Matud sa pangulo sa Cebu City Transportation Office (CCTO) Atty. Rafael “Raffy” Yap nga daghan ang volume sa sakyanan nga nitadlas sa SRP tungod kay nagdungan kagahapon ang mga dakong kalihokan.

Dugang pa ni Yap nga nasinati ang problema sa traffic sugod sa eskina sa Vestil Street sa N. Bacalso Avenue padung na sa Mambaling Access Road pasud sa SRP gikan pa sa alas-8 sa buntag.

Gihulagway ni Yap nga abnormal ang gidaghanon sa mga sakyanan kagahapon tungod kay nagdungandungan ang mga kalihokan ug sirkumstansya sama na lang sa kataposang Biyernes sa buwan nga kasagaran adunay daghang manuroy ug ang pag-abli sa SM Seaside.

Nakadugang usab niini ang kawala pay impormasyon sa mga drayber kun asa ang parkingan diha sa SM Seaside. Gani adunay gamay nga luna sa San Pedro Calungsod Templete duol sa maong mall ang giparkingan og mga sakyanan.

Hinuon gihulagway ni Yap nga manageable ra ang dagan sa trapiko ug nakatabang usab ang pagtangtang sa center island diha sa Mambaling.

Gisugyot usab ni Atty. Rey Gealon sa CCTO ngadto sa mall nga ang pag-inspeksyon sa mga sakyanan anha himuon sud sa ilang area ug di sa dalan aron maglahos-lahos ang mga sakyanan. (Sheriza Mae R. Uy ug Rowena Capistrano/EIM)(BANAT NEWS)