Dul-an 10 mil nagparehistro sa IEC2016
CEBU, Philippines – Walo na lang ka semana ipahigayon na ang 51st International Eucharistic Congress dinhi sa Dakbayan sa Sugbo sunod tuig ug niabot na og 9, 348 ang nagparehistro aron motambong sa maong kalihukan.
Base sa talaan sa Registration Committee adunay 7,161 na ang nakabayad nga mga delegado ug duna pay 2, 187 ang nagparehistro apan wala pa nakabayad.
Sa 9,348 ka mga delegado, 3,487 ang moapil sa tibuok congress nga magsugod sa Enero 24 ngadto sa 31, 2016 ug dunay 1,759 ang moapil sa upat lang ka adlaw nga congress gikan sa petsa Enero 24-27 ug duna say laing 2,946 ang motambong sa laing upat ka adlaw nga congress nga magsugod sa Enero 28-31.
Nag-una ang mga delegado gikan sa nagkadaiyang mga archdiocese dinhi sa nasud nga adunay nagparehistrong delegado.
Gisundan kini sa Taiwan, Canada, America, Australia, Vietnam, China, Japan, Hong Kong, ug ang Switzerland.
Matud pa ni Auxiliary Bishop Dennis Villarojo ang Secretary General sa IEC nga daghan pa ang mangabot-abot nga mga registered delegates tungod kay aduna na may nagpahibalo daan nga aduna silay mga representanteng ipadala ilabi na ang gikan sa lain nga nasud.
Sumala pa ni Villarojo, sama ang ubang mga IEC nga nahitabo kaniadto didto sa ubang mga nasud kadaghanan anha na magparehistro ang mga delegado kun hapit na ang kalihukan. Giawhag usab ni Villarojo sa tanang mga Sugbuanon nga moapil gayud sa kalihukan sa IEC ilabi na kadtong bukas alang sa publiko. (Rowena D. Capistrano/EIM)(BANAT NEWS)
- Latest
