Rama negatibo sa drug test — Dr. Utlang
CEBU, Philippines – Ang pangulo sa Cebu City Office for Substance Abuse Prevention (COSAP) mimatuod nga si Mayor Michael Rama negatibo sa duha ka drug test nga gihimo ngadto kaniya makaduha ka higayon.
Si Dr. Alice Utlang miingon nga ang unang drug test kang Mayor Rama gihimo kaniadtong miaging tuig samtang ang ikaduha nga drug test gipahigayon sa miaging buwan sa Oktubre.
Ang resulta sa duha ka buwag nga drug test gipresentar ni Utlang tungod sa misibaw karon nga mga tabi-tabi, ilabi na diha sa social media, nga si Mayor Rama usa ka drug user.
Gani, si Mayor Rama mihulga nga ipangkiha niya kadtong mga responsable sa pagpalakaw og mga tabi-tabi nga siya tiggamitan og gidili nga drugas.
Apan gisalikway ni Rama ang paghagit ni kanhi mayor Tomas Osmeña, iyang higpit nga kontra sa politika, nga siya ikiha tungod kay apil siya nga nagduda nga drug user ang mayor.
Matud ni Rama nga dili niya usikan ang iyang oras sa pagpasaka og kaso batok ni Osmeña nga klaro kaayo nga gitumong lang aron makapadugang sa iyang popularidad atol niining nagkaduol nga eleksyon.
Si Rama miangkon nga miniwang ang iyang panglawas apan matud niya nga tungod kini sa iyang diabetes nga dili na siya mokaon og daghan aron mapugngan ang pagsaka sa iyang blood sugar. Sila si Rama ug Osmeña magsangka pagbalik pagka mayor dinhi sa dakbayan sa Sugbo atol sa eleksyon karong sunod tuig. (Sheriza Mae R. Uy/RUB)(BANAT NEWS)
- Latest
