One-lane traffic sa Mandaue gilugwayan
CEBU, Philippines - Gilugwayan og tulo ka buwan ang gipatuman nga one-lane traffic scheme sa pipila ka dalan sa Dakbayan sa Mandaue nga una’ng gitun-an niadto’ng Agosto 25.
Si Glenn Antigua, executive officer sa Traffic Enforcement Agency of Mandaue, niingon nga ila’ng namatikdan nga epektibo sa pagpaluag sa dalan ang gipatuman nga one-lane traffic scheme.
Ang mga dalan mao ang A. del Rosario sa Mantuyong padulong Sotero Cabahug sa Centro lahos na sa Ibabao-Estancia. Sa pagbalik sa mga sakyanan sa Centro, ang mga sakyanan lakip na sa pribado, taxi ug jeepneys mosubay sa dalan P. Burgos sa Alang-Alang tuyok luyo sa City Hall.
Sa pagpadulong sa Dakbayan sa Sugbo mahimo’ng moliko sa wala subay sa Sotero Cabahug extension atubangan sa National Shrine of Saint Joseph lahos sa Ouano Avenue sa North Reclamation Area. Mahimo usab moliko sa tuo ngadto sa Sotero Cabahug apan sa paghidangat sa eskina F.B. Cabahug adto kini liko sa wala padulong sa Guizo paingon na sa Dakbayan sa Sugbo. (BANAT NEWS)
- Latest
