NBI clearance requirement gihapon pagkuha’g lisensya

CEBU, Philippines - Magpadayon gihapon ang Land Transportation Office-7 sa pag-require sa mga drayber nga magkuha og professional driver’s license nga moduso og National Bureau of Investigation Clearance  gawas sa Police Clearance.

Kini bisan mipagawas og memorandum si Department of Transportation and Communication Secretary Joseph Emilio Abaya nga temporaryong nagsuspenso sa maong mga rekisitos.

Ang polisiya sa DOTC gikwestiyon sa pipila ka mga senador atol sa gihimong Senate budget hearing diin sila si Senate President Franklin Drilon ug Senator Ralph Recto migisa  ni Abaya kalabot niini.

Apan sa pagkutlo ning maong balita, gibutyag ni Alita Pulga, Assistant Regional Director sa LTO-7 nga wala pa silay official order gikan sa DOTC nga nagmando kanilang di na pangayoan og NBI clearance ang mga drayber. Giklaro hinuon sa ahensiya kadto rang dugang requirements sa pagkuha og professional driver’s license ang temporaryong gisuspenso apan ang ubang provision sa revised rules and regulations magpabilin.

Nasayran nga sukad naimplementar ang bag-ong balaod niadtong Nobiyembre 16 nakadawat ang LTO-7 og mga reklamo kay hasol kaayo kini. (BANAT NEWS)