Way basehan aron di ipagamit ang halin sa SRP—korte

CEBU, Philippines - Gibasura sa korte ang gisang-at nga petition for declaratory relief nga gipangayo ni Romulo Torres bahin sa kasong iyang gisang-at batok sa konseho sa Dakbayan sa Sugbo may labot sa paggamit sa siyudad sa halin sa South Road Properties. Sumala pa nga way nakitang basehan si Judge Alexander Acosta nga paboran si Torres sa iyang argumento batok sa konseho.

Karong nabasura na kini, si Cebu City Legal Council Atty. Jerome Castillo miingon nga wala nay rason ang konseho karon nga dili tukion ang Supplemental Budget No.1 nga gipadaplin lang sa nanglabay nga mga sesyon tungod sa maong kaso.

Apan si Konsehal Sisinio “Bebz” Andales sa iyang bahin nagkanayon nga dili pa gihapon angay tukion ang SB 1 tungod wala pa’y final judgement sa kaso tungod kay posible nga mopasaka og motion for reconsideration si Torres.

Si Castillo mipasabot nga imposible na kana nga mahitabo nga ipasaka pa sa Supreme Court ang maong kaso human nga nidesisyon na ang korte nga walay basehanan nga dili ipagamit sa siyudad ang halin sa South Road Properties (SRP).

Samtang si Mayor Michael Rama malipayon tungod sa pagbasura sa kaso ug mihangyo sa konseho nga paminawon ang gisinggit sa katawhan nga makabenepisyo gikan sa halin sa SRP.

Ang gamitan sa kwarta sa SB 1 naglakip sa productivity enhancement incentives (PEI) sa mga kawani, pangbayad sa utang sa siyudad sa katukoran sa SRP, bayad sa tipping fees sa basura sa siyudad ug uban pa. (BANAT NEWS)