VSMMC maoy paimbestigahon sa DOH-7

CEBU, Philippines – Hatagan una og higayon sa Department of Health (DOH)-7 ang kadagkuan sa Vicente Sotto Memorial Medical Center (VSMMC) nga mohimo og kaugalingong imbestigasyon labot sa reklamo sa usa ka 23-anyos nga inahan kansang pantog naapil sa pagkahiwa atol sa iyang caesarian operation sa maong tambalanan.

Matud ni Ligaya Moneva, tigpamaba sa DOH-7, ilaha nang gi-forward ngadto sa VSMMC ang letter of complaint nga gipadangat ug pinirmahan ni Leonard Parantar, kaipon sa pasyente nga si Jermelyn Bactismo, residente sa Barangay Pitalo, Lungsod sa San Fernando.

Sayo niini, niadtong Nobiyembre 5 sa gabii, gidala sa tambalanan si Bactismo, human kini nagbati sa iyang unang anak.

Apan tungod sa lisod nga sitwasyon human nasayran nga nakakaon na og hugaw ang anak sa sulod sa sabakan niini gipaubos sa caesarian operation si Bactismo pagka Nobiyembre 6 sa kaadlawon.

Luwas nga nakagawas ang iyang anak apan gipahibawo siya sa doktor nga mi-opera kaniya nga wala tuyoa nga naapil pagkahiwa ang iyang pantog maong i-catheter una kini aron adunay kagawasan sa iyang ihi.

Ang maong tubo nakahasol kaniya apan dihang nangayo sila og tabang sa VSMMC, gipasa na hinuon sila ngadto sa pribadong tambalanan. Tungod kay wa man silay kwarta para niini nireklamo sila sa DOH.

Giklaro ni Moneva nga ang aspeto lang sa licensing ug regulation mahimong manubag ang tambalanan ngadto sa ilang buhatan, apan sa bahin sa medical malpractice, ang Professional Regulations Commission (PRC) ang dunay hurisdiksyon niini.

Si Dr. Antonio Paradela, Chief of Professional Medical Clinics sa VSMMC, sa dihang gikuhaan og komento labot sa maong issue igo lang kini nipahibawo nga duna nay giumol nga komitiba ang ospital nga maoy ni-imbestigar sa reklamo. – /EIM) (BANAT NEWS)