Barko sa 2Go naaberya, mga pasahero nagbagulbol

CEBU, Philippines – Mireklamo ang mga pasahero sa M/V St. John Paul II nga iya sa 2GO Shipping Lines nga biyahe og Manila-Cebu-Cagayan De Oro City human sila natanggong sa dagat dul-an sa 24 oras tungod lang sa naguba nga rampa niini.

Gireklamo nila kun nganong dugay silang gipakanaog samtang kadto untang gusto nga mobalhin na lang og laing barko dili makahimo niini kay layo kaayo ang gidunggoan sa barkong ilang balhinan gikan sa nahimutangan sa ilang barko.

Ang M/V St. John Paul II didto gi-angkorahe sa Pier 6 ug naabtan pa sa Banat News nga padayong giayo ang rampa samtang ang mga pasahero naglantaw gikan sa mga bintana niini. Usa sa mga pasahero sa maong barko si Raul Aleria, kanhi Kapitan sa Barangay Bogo, Cagayan De Oro City ug paingon na kini mopauli balik sa CDO ang mireklamo kay wa silay mahimo sa sitwasyon.

Si Aleria nga nakahinabi sa DyHP-RMN-Cebu  miingon nga daw gibati sila og walay kapaingnan sa sitwasyon kay gustohon man nilang mokanaog, wala silay maagian nga damyo. Matud pa niya, daghang pasahero nga adunay dinaliang transaksyon ang nangalangay.

Si Lito Salvio, Assistant Vice President sa 2Go Group nga nahinabi gihapon sa maong sibyaanan miingon nga ilang i-transfer ang mga pasahero sa barkong Saint Leo the Great.

Andam usab sila moproseso sa mga gustong mobalhin og laing barko ug sa mga pasahero nga gustong magpa-refund sa ilang pleti. Si Coast Guard Cebu Station Commander, Agapito Bibat miingon ang M/V St. John Paul II dili makabiyahe kun dili pa maayo ang rampa niini.

Nasayran ang mga pasahero gikan sa Manila anaa sa 350 ug ang Cebu paingon sa Cagayan De Oro City anaa sa 219.  Samtang nagpaabot nga maayo ang rampa, giatiman sila sa mga crew.

Adlaw’ng Domingo nigikan sa Manila ang barko ug kagahapon unta sa alas-7 sa buntag moabot sa Sugbo ug mobiya lahos sa Cagayan alas-10 sa buntag apan tungod sa aberya nalangay ang ilang schedule. – /EIM) (BANAT NEWS)